​ Уралдаанч Б.Батсүлд: Наадам эхлээд гурав дахь насаа унаж айрагдууллаа

Үндэсний их баяр наадам, Их Монгол улс байгуулсаны 813 жилийн ой, Ардын хувьсгалын 98 жилийн ойн баяр наадмын хурдан морины уралдаанд /2019.07.11/ уралдаанч Буянтогтохын Батсүлд унасан хүлгээ аман хүзүүгээр давхиулж, төрийн наадмаас анхны айргаа хүртсэн баяраа ийнхүү хуваалцсан юм.

-Сайхан наадаж байна уу? Баяр наадмынхаа сэтгэгдлээс манай уншигчидтай хуваалцаач?

-Сайхан наадаж байна. Төрийн наадмаас анхны айргаа авлаа. Сэтгэл их өндөр байна.

-Энэ наадмаар хэдэн нас унаж байгаа билээ?

-Гурав дахь насаа уналаа. Өчигдөр шүдлэн унаагүй. Хязаалан 20-иодоор ирээд, өнөөдөр азарга 80 гаргаж давхисан. Харин их нас аман хүзүүдлээ. Урд нь явсаар байгаад л эргэлээ.

-Уяач нь юу гэж захисан?

-“Морио сайн хурдлуулаарай.Замдаа болгоомжтой давхидаг юм шүү” гэж захисан.

-Аль сургуулийн хэддүгээр ангид сурдаг юм бэ?

-Багахангай цогцолбор сургуулийн хоёрдугаар ангид сурдаг.

-Ямар хичээлдээ дуртай вэ? Хэд сурч байна даа?

-Бүх хичээлдээ дуртай. Дажгүй сурч байгаа. Уяач ах дуудаж байна.

Хүйн долоон худгийн цэнхэр хашаанд өрнүүлсэн бидний яриа нэг иймэрхүү. Бяцхан уралдаанчид дараа дараагийн уралдаанд нь амжилт хүсье.

П.Ундраа