Нийслэлийн Алдарт уяач С.Ганзориг: Махвалын Англи азарганы төлүүд

-Ганзориг Алдарт өнөөдөр тун одтой байлаа. Баярынхаа сэтгэгдлээс хуваалцаач?
-Баярлалаа. Миний баярт агшинтай үргэлж хамт байдаг “Тод магнай” сэтгүүлийн хамт олон та бүхэнд. Шороотой, шуургатай байсан хэдий ч уралдааны тухайд ярих юмгүй сайхан боллоо. Энэ уралдаанд би гурван даагатай ирсэн. Нэг нь аман хүзүүнд, нөгөө нь гурваар бас нэг нь  13-аар давхилаа. Сэтгэл их өндөр байна.
-Даагануудынхаа удам угшлыг танилцуулаач?
-Аман хүзүү болон 13-т хурдалсан дааганууд цөм Махвалын ноднин жил авчирсан Англи азарганы төлүүд байгаа юм. Охин дааганууд л даа. Эх нь миний өөрийн монгол гүү байдаг юм.
-Та уралдааныг дагаж үзэв үү?
-Тэгсээн. Автобусаар дагуулдаг чинь их зөв юм байна. Хүн болгон л өөрийнхөө даагыг харах гэнэ шүү дээ. Тэгэхээр тэр олон жийп давхиулж тоос бужигнуулж байхаар ингээд автобусаар салхин доор нь дагавал зүгээр юм байна.