Самбуу Ням-Эрдэнэ

Товч намтар: Аймгийн Алдарт уяач Самбуугийн Ням-Эрдэнэ нь 1959 оны нэгдүгээр сарын 07-ны өдөр Алаг-Эрдэнэ сумын Мандал хэмээх газар айлын том хүүхэд болон мэндэлсэн. Аав Дэжидийн Самбуу Алаг-Эрдэнэ сумын “Хөгжил” нэгдлийн адууг 20 гаруй жил маллажээ. Нутгийн Төмөрхүү, Дамбасүрэн гэж хоёр хүний морийг таван жил унаж уралдаанчаас эхэлсэн С.Ням-Эрдэнэ 1983 оноос аавдаа тусалж уяаны эрдмээс суралцсан байна. 1977-1980 онд Улаанбаатар хотын 013 дугаар ангид цэргийн алба хааж, улмаар нутагтаа бригадын аж ахуйд тоо бүртгэгч, даргын ажил эрхэлжээ. Гавьяа шагнал: 2003 онд аймгийн Алдарт уяач, ММСУХ-ны 20 жилийн ойн медаль, баярын бичгээр тус тус шагнагдсан. 

Сумын чанартай наадмаас 20 гаруй, овоо тахилга зэрэг бага наадамаас олон айраг, түрүү хүртжээ. 
Амжилт үзүүлсэн аргамаг хүлгүүд: 
Хүрэн азарга
Удам угшил: Эрхэл талын таван хээрийн удам. Тууварчны үлдээсэн гүүний унага
Амжилт: “Алтан дорнод хурд”-д түрүү, даага, шүдлэн, соёолондоо суманд түрүүлсэн. 2006 онд Алаг-Эрдэнэ сумын 80 жилийн ойд аман хүзүүдсэн. Азарга болоод Хатгал, Алаг-Эрдэнэд сумандаа түрүү, айрагт олон хурдалсан. 
Хээр азарга
Амжилт: “Алтан дорнод хурд”-д айргийн гурав, Алаг-Эрдэнэ сумын 80 жилийн баяр наадамд мөн айргийн гурваар хурдалсан. 
Хонгор халзан морь
Амжилт: “Алтан дорнод хурд”-д айргийн дөрвөөр давхисан.