МУ-ын Алдарт уяач Н.Хүрлээ: Яруу саарал давхар уяагаараа айрагдлаа

-Таны  Яруу саарал  дахин айраг хүртлээ. Баярын сэтгэгдлээсээ бидэнтэй хуваалцаач?
-За баярлалаа.  Яруу саарлын хувьд энэ бол гурав дахь наадам болж байгаа юм. Сая төвийн бүсийн наадамд дөрвөөр давхиад залгаад “Макс”-ын 20 жилийн ойд айрагдлаа. Энэ удаад гурав дахь уяагаараа сайхан наадлаа.
-Яруу саарал ямар угшилтай вэ?
-Дорнод аймгийн Матад сумын Цэрэнжав гэж хүний  унаган адуу байгаа юм.
-“Дорнын унага” галынхан энэ жил одтой сайхан наадсан байгаа?
-Тийм ээ, Цэндбаатарын уяаг нь тааруулдаг Улс халзан маань төрийн баяр наадамд хоёр дахиа түрүүлж, Бандгаагийн бор айргийн таваар хурдаллаа. Мөн Ж.Энхболдын хүрэн үрээ түрүүлсэн. Манайхан энэ жил одтой сайхан байгаа. Ер нь манай уяанд улс бүсийн довтой мундаг хүлгүүд уягддаг юм.
-Сэтгэгдлээ хуваалцсан танд баярлалаа?
-Монгол улсын Тод манлай уяач Д.Ганбаатар, Д.Цэрэнжигмэд нарын үүсгэн байгуулсан Макс группын түүхт 20 жилийн ойн баяр сайхан болж байна. “Макс”-ын хамт олонд ажлын амжилт хүсье.
-Ярилцсанд баярлалаа.