М.Ганзориг: Моринд дуртай хүмүүсийн заавал унших сэтгүүл

-Танд энэ өдрийн мэнд хүргэе. Хэзээнээс манай сэтгүүлийг захиалж эхэлсэн бэ?

-Та бүхэнд болон Тодмагнай сэтгүүлийн уншигч олонд энэ өдрин мэнд хүргэе. Би Ховд аймгийн “Алтай унага” уяачдын холбооны тэргүүлэгчээр 2008 оноос ажиллаж эхэлсэн. Моринд элэгтэй нутгийн олныхоо уяачид, хурдан хүлгэд дотор амьдарч ирсэн хүн л дээ. Өмнө нь баяр наадмын морины комистт 10 жил ажилласан. Танай сэтгүүлийг уншдаг болоод удаж байна. Моринд дуртай хүмүүсийн заавал унших сэтгүүл гэж боддог. Манай Нею прогресс компани маань уяачид, унаачид, морьдоо дэмжиж хандив туслалцааг байнга үзүүлж ирсэн.

-Танай компани ямар чиглэлээр үйл ажиллагаагаа явуулдаг юм бэ?  Уралдааны бай шагнал дээр нь тусалдаг уу?

-Үндэсний бүтээн байгуулагч “Нею прогресс” компани маань 1999 онд үүсэн байгуулагдсан. Дэд бүтцийн гурван салбар болох  эрчим хүч, авто зам, барилга байгуулалт гэсэн салбарт үйл ажиллагаа явуулдаг. Жил болгоны улсын баяр наадмаар их нас, азарганы байнуудыг өгдөг. Онцолж хэлбэл 2008 оны  баруун бүсийн “Их хурд” даншиг наадмын их насыг пургон машинаар, азаргыг “Уаз-469”, өнгөрсөн жил Ховд аймгийн 80-н жилийн ойн наадмын их нас, азарга хоёрыг “Уаз-469” машинаар байлж байлаа. Залуус маань өөрсдөөсөө зардал мөнгө гаргаад л явцгааж байна. Зугаа цэнгэлдээ биш шүү дээ. Ард түмнийгээ баясгах гэж. Тийм учраас энэ хүмүүсийг дэмжих юмсан гэдэг үүднээс манайх ингэж ажилладаг юм.

-Манай сэтгүүлийн аль буланг унших дуртай вэ? Цаашид юуг анхаарвал зүгээр гэж та бодож байна?

-“Тод магнай” сэтгүүлийнхээ дугаар бүрийг хадгалдаг. Хүүхдүүд маань ч уншдаг юм. Мундаг уяачдын зөвлөгөө, зөвлөмж, энд тэндхийн холбоод, тамганы тухай булангууд их сайхан. Цаашдаа морины уяа сойлгоны талаар илүү их мэдээлэл оруулж байгаарай л гэмээр байна. Та бүхний ажилд амжилт хүсье. Баярлалаа

-Сэтгэгдлээ хуваалцсанд баярлалаа.

                                                                                                                                                               Ш.Бадмаа