“Ажнай” галын уяач Ө.Мөнхтайван: Шарга үрээ айрагдаж урам нэмсэн

-Төрийнхөө их баяр наадамд хурдан соёолонгоо айрагдуулж, бахтай сайхан наадлаа. Баяр хүргэе?
-Баярлалаа. Та бүхэнд ч гэсэн АХ-ын 91, Их Монгол улс байгуулагдсаны 806 жилийн ойн баяр наадмын мэнд хүргэж, ажлын амжилт хүсье. Ерөөл дагаж нар хур тэгширсэн энэ жилийн баяр наадамд хээр үрээгээ тавлууллаа. Сайхан байна. Юун түрүүнд нутгийн ард олондоо намайг дэмжиж байсан ээж, хань, ах дүү, найз нөхөддөө, уяач Болд-Өрнөхдөө баярласнаа илэрхийлмээр байна.
-Өмнөговийнхон тэр дундаа “Ажнай” гал уяаныхан өнгөтэй өмтэй сайхан наадлаа?
-Харин тиймээ.Ажнай галынхан маань төрийн наадмын азарганы түрүүг хүртлээ.  Хязаалан, соёолон айрагдууллаа.
-Мөнхтайван уяач  морь сонирхоод удаж байна уу?
-Манай дээдчүүл сайн адуутай, моринд дуртай хүмүүс. Миний өвөө Алтангэрэлийг сум орон нутгийнхан нь андахгүй дээ алаг адуут Алтангэрэлийнхэн гэхээр. Моринд дуртай өвөг дээдсийн нөлөө байсан байх. Бас “Ажнай” галынхан маань нөлөөлсөн. Зууны манлай уяач Д.Даваахүү, Манлай уяач Д.Бат-Эрдэнэ, Алдарт уяач Д.Дагвадорж ах нарыгаа дагаж явсаар адуунд дуртай болж, өөрийн нэртэй адуутай болъё гэж бодох болсон юм. Тэгж байгаад өнгөрсөн жилийн дөрвөн сард Сүхбаатар аймгийн Баяндэлгэр сумын уугуул Пүрэвсүрэн гэдэг хүнээс шарга шүдлэн авсан. Шарга үрээ маань над дээр ирээд сарын дараа Өмнөговь аймгийн баруун бүсийн наадамд айргийн гурваар давхиж маш их урам хайрласан. Тэгээд л Болд-Өрнөхтэйгээ ярьж байгаад Чулуун гуайнхаас адуу авсан.
-Тэрэн дунд хээр үрээ байсан уу?
-Тиймээ, хээр үрээ  Сүхбаатар аймгийн Мөнххаан сумын аймгийн Алдарт уяач Өндөр хэмээн Чулуун  гуайн унаган адуу байгаа юм. Би хүү Ганболдтой нь гэмгүй сайхан нөхөрлөдөг найзууд. Тэгээд найзаараа дамжуулж байгаад ааваас нь хоёр үрээ, нэг азарга авсны нэг нь хээр үрээ маань байгаа юм. Өнөөдөр хээр үрээ олон сайхан хурдан буянгуудтай уралдан айрагдаж байгаа нь Чулуун ахын маань өгье гэсэн сайхан сэтгэлийн үр байх. Энэ дашрамд Чулуун ахдаа, Ганболд найздаа баярласнаа илэрхийлье.