“Ирээдүйн түмэн хурд 2013”-ын бүртгэл эхэллээ

2007 оноос эхлэн Дорноговь аймгийн Сайншанд сумын уугуул Манлай уяач Г.Алтангэрэлийн санаачлагаар зохиогдож эхэлсэн Монголын хурдан морины түүхэн дэх хамгийн өндөр шагналын сантай буюу түрүү даага ”Land Criuser” маркийн авто машины бай шагналыг хүртдэг “Ирээдүйн түмэн хурд” өндөр бооцоот хурдан дааганы уралдааны бүртгэл эхэллээ. Анхны жил Булган аймгийн Гурванбулаг сумын уяач П.Мэндбаярын бор түрүүлж байснаас хойш Завхан аймгийн Тосонцэнгэл сумын уяач Т.Галбадрахын зээрд халзан, Төв аймгийн Сэргэлэн сумын Монгол улсын Тод манлай уяач Д.Ононгийн хээр, Ховд аймгийн Буянт сумын уяач Э.Тамирын хүрэн, Дорнод аймгийн Цагаан-Овоо сумын аймгийн Алдарт уяач Т.Батзоригийн халтар, Дундговь аймгийн Сайнцагаан сумын аймгийн Алдарт уяач П.Одонбаатарын халтар дааганууд магнайдаа тоосгүй хурдлан уясан эзэн, унасан хүүхдээ баярлуулаад байгаа билээ.
Ийнхүү долоо дахь жилдээ зохион байгуулагдах гэж буй тус уралдааны бүртгэл энэ сарын 02-ны өдөр эхлээд байна. Энэ удаад 12-р сарын 31-ийг хүртэл 1000$, 2013 оны 01-р сарын 01-ээс 31-ийг дуустал 1500$, 02-р сарын 01-ээс 29-ийг дуустал 2000$-оор тус тус бүртгэх ажээ. Эрлийз монгол, эр охин гэж ялгадаггүй “Ирээдүйн түмэн хурд” өндөр бооцоот хурдан дааганы уралдаан нь 2013 оны 5-р сард уламжлал ёсоор Хүй долоон худаг, Цагаан хөтөлд болох юм.