Хөвсгөл аймгийн 2013 оны уралдаануудын тов гарлаа

Хөвсгөл аймгийн “Дэлтэй цэнхэр” морин спорт уяачдын холбооны тэргүүлэгчдийн хүсэлтийг аймгийн ИТХ-ын тэргүүлэгчдийн 2012 оны 12-р сарын 17-ны өдрийн  хуралдаанаар авч хэлэлцэн 2013 онд зохиогдох томоохон уралдаануудын товыг баталсан байна.
Шинийн найманд дээд гурван насны морьдын уралдаан Мөрөн суманд зохион байгуулагдах бол, хаврын бүсийн уралдаан Эрдэнэбулган суманд шинийн 15-нд, харин  доод гурван насны морьдын шилдэг хүлэг шалгаруулах уралдаан Мөрөн суманд 6-р сарын 1-нд тус тус зохион байгуулагдахаар болжээ.  Дээрх гурван уралдаан нь аймгийн чанартай  наадамд тооцогдох бөгөөд цаашид уламжлал болгон явуулж байхаар тогтсон байна. Мөн түүнчлэн “Дэлтэй цэнхэр” уяачдын холбооны нэрэмжит “Ирээдүйн түмэн эх” хурдан дааганы уралдааныг зөвхөн  Хөвсгөл аймгийн уяачдынхаа  дунд зохион байгуулахаар тогтжээ. Энэхүү уралдаан өнгөрсөн жил Бүрэнтогтох суманд амжилттай зохион байгуулагдсан бөгөөд түрүү даагыг таван сая төгрөгөөр байлан уяачид оролцогчдоос өндөр үнэлгээ авсан юм. Тиймээс ч уяачдын хүсэн хүлээдэг уралдааны нэг болсон энэхүү уралдааныг цаашид уламжлал болгон зохион байгуулж байхаар шийдсэн аж.

А.Мөнх-Эрдэнэ