"Урьхан санаа" ХК-ийн дэд захирал Б.Чинбат: Манайх унаган адуутай айл

-Улсын наадмаас их мориор айраг хүртсэн танд баяр хүргэе?
-Баярлалаа. “Тод магнай” сэтгүүлээрээ дамжуулан морь сонирхдог Монголын ард түмэндээ энэ өдрийн мэнд дэвшүүлье.
-Хэзээнээс хурдан морь сонирхох болсон бэ?
-Манайх Төв аймгийн Баянцагаан сумын уугуул унаган адуутай айл. Мориныхон андахгүй дээ, Тожил уяачийг. Тэр хүн манайхтай ах дүүс гэж хамаасдаг. Өвгөдийнхээ удмыг таслахгүй гэсэн бодол, өөрсдийн моринд дуртай сэтгэл маань хөтөлж дүү бид хоёр 1996 оноос хурдан адуу цуглуулах болсон. Бараг Монголын 18 аймгаас адуу цуглуулсан байх.Өнгөрсөн жил Бандгай Ганхуягаас Англи эцэгтэй Монгол эхтэй нэг үрээ авсан. Энэ жил Билэгдэмбэрэлээс бас нэг үрээ авсан. Би  морийг хобби маягаар сонирхдог бол, манай дүү их дурлаж хорхойсдог.
 -Хурдан хурц адуу цуглуулаад багагүй хугацаа өнгөрч байгаа юм байна. Унаган адуу хэр давхиж байна?
-Өө яахав давхиж л байна. Хонгор морь маань Төв аймгийн 80 жил, Говь-Шанхын наадамд тус тус түрүүлсэн. Архангайн 80 жилд аман хүзүүдсэн. Морь сонирхдог хүмүүс мэднэ дээ.
-Бооцоот уралдаанд нэлээд хорхойтой дуулдсан?
-Морь сонирхдог найз нөхөдтэйгээ бооцоо тавьж уралданаа.Гэхдээ байнга бишээ.
-Дааганы уралдаанд оролцдог уу?
-Оролцоноо. Ноднин 13 билүү 14-өөр орсон. Энэ жил бүртгүүлэх гээд л байж байна. Дээр ярьсан даа, Манлай уяач Билэгдэмбэрэлээс нэг даага авсан гэж. Түүнийхээ ид шидийг үзнэ дээ.
-Сонирхоод асуухад морьтой холбогдсоноор таны амьдралд ямар өөрчлөлт гарсан бэ?
-Энэ талаар бодож байгаагүй юм байна. Гэхдээ дуртай юмаа хийж байгаа болохоор сайхан байлгүй яахав. Тэгээд ч цаг зав гарвал түүнийгээ зөв боловсон өнгөрөөж байна. Дээр нь найз нөхдийн хүрээлэл тэлж байна.

"Тод магнай" сэтгүүл дугаар №2