Зоос бор

А.Тэлмэн
2013 оны 2-р сарын 22 -нд

Морин шүтлэгтэй өвгөдийн маань тоосонд нь ороход хийморь сэргэж, бүтэн жилийн засал болдог хэмээн бэлгэшээсээр  ирсэн соёолонгийн уралдааныг энэ жил хязааландаа улсын наадамд аман хүзүүдэж, Төвийн бүсийн даншиг наадамд түрүүлсэн, олноо "Зоос" бор хэмээн алдаршсан бор үрээ өнгөлсөн. Даагандаа баян ходоод болж, олны өхөөрдлийг хүргэж  байсан  "Зоос" бор улсын баяр наадмын дараа Очирваанийн хурдад тасархай түрүүлэн, энэ цагийн хурдан хүлэг болохоо баталсан билээ. 
Сүхбаатар зүгийн гаралтай “Зоос” бор соёолонгийн угшил гарвалын талаар хэд хэдэн янзаар ярьдаг. Ямартаа ч даагандаа сумандаа баян ходоод болж, шүдлэндээ мөн л олигтой сайн давхиагүй бор үрээг хязааланд нь одоогийн эзэн Д.Батбаярт галынхан нь бэлэглэжээ. Хаврын нэгэн шороон шуургатай өдөр байсан учраас гэрийнхээ үүдэнд авчруулж хадаг уяад "салхинаас өөрийг толгойдоо битгий хүргээрэй" хэмээн ёсолсон ч яг үнэндээ ойшоогоогүй хэмээн тэрээр одоо дурсан ярьдаг. Д.Батбаярын хэмээн цоллогдох болсон бор үрээ сар
гаруйн дараа 4-р сарын сүүлээр Төв аймгийн Эрдэнэ суманд болсон нэгэн уралдаанд түрүүлж,  дахан дор эр, даарин дор хүлэг гээчийг баталжээ. Үүнийхээ дараа Амарбаясгалант хийдийн Дархан соовин Даваахүү ламтны 100 насны ойн наадамд мөн л түрүүлж, улсын  баяр наадамд аман хүзүүдсэн юм. Галынх нь нэрээр нэрлэгдсэн бор үрээ уралдсан наадмууддаа тогтмол амжилт үзүүлэх болсон тул эзэн нь энэ жилийн улсын баяр наадмаар хэнд ч хэлэлгүй хадаг өвөртлөн очсон гэдэг.
Ийнхүү гэнэт цойлсон бор үрээний амжилтыг ойр тойрныхон нь уяатай нь холбон тайлбарладаг. Олноо Дааган хэмээн алдаршсан, Нийслэлийн Алдарт уяач Ц.Цэнд-Аюуш бор үрээнийхээ уяаны онцлогийг “Зоос” бор давхар уяанд даацтай адуу. Наадмаас наадмын хооронд ханасан ажил хийнэ. Энэ жилийн улсын наадмын хувьд тарган талдаа давхисан. Тэгэхдээ уяа дөхөж очсон л доо. Бороотой байвал сайн давхих байх гэж бодож байтал, мэдсэн юм шиг тэгж таарсан. Дараа нь давхар уяагаар Завханд хол тасарч түрүүлсэн. Завханд бол яг формондоо орсон байсан” хэмээн ярьсан юм.

 

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна