Европод хууль бусаар адуу нийлүүлэх нь мафитай холбоотой

А.Тэлмэн
2013 оны 2-р сарын 25 -нд

Монголд малын хулгай анхаарал хандуулах асуудал хурц сэдвүүдийн нэг болсоор ирсэн.  Хэдийгээр энэ хэрэг дээр бүхэл бүтэн хэлтэс ажиллаж байгаа ч тодорхой үр дүнд хүрэхгүй байгаа талаар холбогдох ажилтнууд мэдээлдэг.Малын хулгай буурахгүй байгаа шалтгааныг нүүдэлчин ахуйтай холбон тайлбарладаг бол суурин иргэншилтэй Европод ч гэсэн иймэрхүү төрлийн гэмт хэрэг гардаг аж. Олон тооны адуу алдагдсан тухай асуудал өнгөрсөн 1 сараас эхлэн яригдсан ч бүгд л өөрсдийгөө ямар нэг байдлаар хамгаалж, хариуцлага хүлээхээс зайлсхийсээр байна.  Гэвч 2 сарын 13-нд Брюссел хотод Европын Холбооны Эрүүлийг Хамгаалахын комиссар ноён Тони Борг зарим хохирогч орнуудын сайд нарыг оролцуулсан уулзалтыг зохион байгуулжээ. Энэ уулзалтаас  3 сарын 1-нээс эхлэн үхрийн болон адууны махан бүтээгдэхүүнд ДНК-ийн шинжилгээ хийх, мөн фенилбутазон ба бусад эмийн орц байгаа эсэхийг шинжлэхээр шийдсэн байна.  Энэ үеэр Ирландын ХАА-н сайд Саймон Ковени  “Бид дахин ийм асуудал гарахгүй гэдэгт итгэлтэй байх ёстой ” гэж хэлсэн бол Их Британийн Гадаад Орчны сайд Оуэн Патерсон “Бид өөрсдийн хүчийг нэгтгэж хэрэглэгчдийн итгэлийг буцаан авах хэрэгтэй байна” хэмээн тэмдэглэжээ.
Хойд Европын иргэд “Шведийн мөр” хэмээх  асуудлаас ихэд болгоомжилдог байна. Учир нь Шведэд жил бүр 9000 орчим  адуу ор сураггүй алга болдог ажээ. Сконе хотын удирдлагууд тэдгээрийг хууль бусаар төв Европын бойны газарт хүргэгддэг байх гэсэ таамгыг дэвшүүлж байгаа бөгөөд энэ хэргийн учрыг тайлахаар адууны үүлдрийн болон фермерүүдийн холбоо ажиллаж байна. Дээрх сураггүй алга болсон адууны тоонд албадан бойнд явуулсан болон өвчний улмаас үхсэн, эсвэл байгалийн жамаар үхсэн адууны тоог оруулаагүй аж. Шведэд өнгөрсөн 10 жилд ор мөргүй алга болсон адууны тоо 100.000-д хүрчээ. Мэргэжилтнүүд үүнд ямар нэг тайлбар заавал байх ёстой тэгээд ч Шведийн өндөр зэрэглэлийн хүнсний бүтээгдэхүүн үйлдвэрлэл маш нарийн технологи, стандарт, хяналттай учраас энэ бүгдийг нуух ямар ч боломж байхгүй, тэгэхээр өөр нэг гарц байна гэж үзжээ.
Амьтан Хамгаалах Нийгэмлэгийн захирал Маттиас Гордлунд: - “адууг хил дамжуулан зөөвөрлөх нь тийм ч хэцүү биш.  Учир нь хил дээр хяналт сул, тиймээс хэн нэг нь мөнгө олохын тулд үүнийг өөгшүүлдэг байхыг үгүйсгэхгүй” гэжээ. Мөн тэрээр Европод хууль бусаар адуу худалдахад хүнсний бүтээгдэхүүн үйлдвэрлэлийн хяналт сул учир энэ бүхэн боломжтой гэжээ.
Svenska Dagbladet сонины сэтгүүлчдэд Амьтан Хамгаалах Нийгэмлэгийн захирал “Та нар арай үхрийн махтай пицца 69 крон /10.9 доллар/-оор зарагддаг гэдэгт итгэдэг юм биш биз дээ” гэсэн ёгт асуулт тавьжээ. Харин үүний хариуд сонины газар морь адууг гадаадад гаргахдаа ХААЯ-аас зөвшөөрөл авдаг талаар судалсан ба харамсалтай нь яаманд нэг ч тийм өргөдөл очоогүй байна.
Шведийн Цагдаагийн Газар одоо бүх төрлийн амьтан зөөвөрлөлтийг мөрдөж хянаж байгаа бөгөөд энэ тал дээр Европолтой хамтарч ажиллахаар болжээ.
Харин Svenska Dagbladet сонин Их Британи, Ирландад жил бүр 75.000 орчим адуу алга болдог тухай мэдээлжээ.

Бэлтгэсэн н.Болормаа
  

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна