МУ-ын Алдарт уяач Б.Мөнхтөр: Хар бор үрээ маань Алдарт цолыг айргаар мялаалаа

-Ардын хувьсгалын 90-н жилийн ойн босгон дээр соёолон айрагдуулсанд баяр хүргэе ?
-Баярлалаа. Хар бор үрээ ахынх нь унаган адуу. МУ-ын Алдарт уяач цолыг минь улсын наадмын айргаар мялаалаа.Төрийнхөө их цэнгэл наадамд соёолон айрагдуулна гэдэг том бахдал байдаг юм байна. Сэтгэл хөдлөөд, хэлэх үг ч олдохгүй юм.
-Тэгэлгүй яахав.Таны  хээр морь монгол хүлгийн шандсыг харууллаа ?
-Өвгөн хээр морь маань энэ жил 19 настай адуу. Идэрхэн настай хурдан хүлгүүдтэй эн тэнцүү уралдан улсынхаа наадамд зургаалж, шигшмэл хурдан хүлгүүдийн “ Их хурд ” уралдаанд айрагдлаа. Энэ бол том бахдал. Хээр морио хараад өөрийн эрхгүй самсаа шархирч байлаа. Аргагүй ховорхон заяах хурдан буян юм даа.
-Хар бор үрээ сунгаандаа яаж давхиж байсан бэ ?
-Энэ жил их сайн уягдсан. Сунгаануудад ер нь өнгөлж байсан. Ямар ч байсан айрагдах байх гэж дотроо бодож байлаа. Санаснаар минь хурдаллаа. Баяртай байна.
-Удахгүй бүсийн уралдаанууд болно. Хаашаа явах төлөвлөгөөтэй байна вэ ?
-Морьдынхоо байдлыг харж байгаад болно доо.
-Ярилцсанд баярлалаа.Хээр морины буян арвижих болтугай.

"Тод магнай" сэтгүүл дугаар №6