Б.Ерөөлт: “Эрлийз адууг монголтой хольж уралдуулах нь дэмий байгаа юм”

Гарч буй жилийн өнгийг тольдож эзэн хүлэг хоёрын хийморийг шинждэг “Дүнжингаравын хурд” хаврын бүсийн уралдааны цар хүрээ жил ирэх тусам тэлж, тэр хэмжээгээр өрсөлдөөн ширүүсч буй.Халхын хурд чуулсан энэ довон дээр хоёр жил дараалан түрүүлж, тод магнай торгон жолоогоо өргүүлнэ гэдэг хүлгийн хурдан, хүүхдийн авхаалж, уяачийн эрдэм төгсийн шинж бизээ. Ингээд “Дүнжингаравын хурд-2012, 2013”  уралдааны түрүү зээрд морины эзэн Ховд аймгийн Чандмань сумын уугуул Б.Ерөөлттэй уулзаж, баярын сэтгэгдэл хуваалцсанаа хүргэж байна.
-Зээрд халзан морь “Дүнжингаравын хурд” уралдаанд хоёр дахь удаагаа түрүүлж энэ цагийн хурдан хүлгийн нэг  гэдгээ баталлаа. Наадмын сэтгэгдлээсээ хуваалцаач?
-Хийморь сэргээсэн үнэхээрийн сайхан наадам боллоо. Зээрд морь маань халхын хурдан буянгууд чуулсан энэ том дэвжээн дээр хоёр дахиа түрүүлж, түмэн олноо баясгалаа. Сэтгэл өндөр байна.
-Зээрд морь Сүхбаатарын адуу гэдэг билүү?
-Тиймээ. Сүхбаатар аймгийн Онгон сумын уугуул О.Үнэнбаярын унаган адуу байгаа юм.
-П.Мэндбаярын хар морийг комиссын шийдвэрээр хасч, халзан морь түрүүлсэн. Энэ шийдвэрийг хэрхэн хүлээж авсан бэ?
 -Хэл ам гаргаад яахав гээд комиссын шийдвэрийг хүлээж  байсан. Нэгэнт эрлийз монголоор нь ялгах тухай шийдвэр гарч, эрлийз ангилалын уралдааныг бий болгочихоод байхад  монгол адуутай хольж уралдуулах нь дэмий л юм байгаа юм.
-Энэ баярт мөчид хурдан хүлгийнхээ бахдам амжилтаас хуваалцах нь зүйтэй байх?
-2007 онд хязааландаа Дарьганга сумын наадамд айрагдаж, хойтон жил нь Шар бүрдний наадамд түрүүлж, хавчиг зургаан настайдаа Дарьганга, Наран, Онгон сумдын нийлсэн "Гурван хонгор"-ын наадамд түрүүлсэн. Харин долоотойдоо уягдалгүй өнжөөд 2011 онд Сүхбаатар аймгийн аварга хүлэг шалгаруулах "Шаргын уул"-ын наадамд айргийн гурваар хурдалж, зун нь Наран сумын наадамд айргийн дөрвөөр давхиж байсан юм. Тэр жилийн намар нь би авсан юм. Надад ирээд "Жейл" ХХК-ийн нэрэмжит наадамд түрүүлж, давхар уяагаар “Дүнжингаравын хурд-2012” уралдаанд хол түрүүлсэн. Энэ жил тэрхүү амжилтаа бататган түрүүллээ.
-Энэ наадамд Ерөөлт уяач хэдэн морьтой ирсэн бэ?
-Их морь, соёолон хоёртой ирсэн. Соёолон маань 30 гаргаж давхилаа.
-Зээрд морь зуны уралдаануудад яаж давхидаг вэ. Жишээлбэл өнгөрсөн зун?
 -Биеэр нь юм туураад болохгүй байхаар нь мордуулаагүй ээ.
-Голлох уяаг хэн тааруулж байна?
-Энэ жил би өөрөө гардаж уясан. Өнгөрсөн жил “Дааган” хэмээх Цэндээ ах маань уяаг нь тааруулсан. Энэ жилээс санаа нийлсэн моринд дуртай найзуудтайгаа хамтарч “Чонон саарал” нэртэй гал байгуулж, морьдоо уяж байгаа. Өнгөрсөн зун соёолон үрээ улсад  айрагдуулсан С.Ганболд  манай уяанд бий. Манайхан одоогоор 30 гаруй морь уяж байна.
-Ингэхэд зээрд морины эзэн ямархан амжилт үзүүлээд байгаа вэ?
 -Томоохон гэвэл бүсийн наадмаас хоёр түрүү, нэг айраг хүртсэн. Зээрд морины бүсийн наадмын хоёр түрүүний амжилтаас гадна Сүхбаатар аймаг байгуулагдсаны 70 жилийн ой, зүүн бүсийн даншиг наадамд миний шүдлэн үрээ айргийн гуравт хурдалсан.
-Хэдхэн хоногийн дараа Эрдэнэтэд бүсийн наадам болно. Зээрд морь уралдах болов уу?
-Санаа байна. Гэхдээ мориныхоо байдлыг харж  байж болно доо.
-Уясан хүлэг тань хурдан байж, тод магнай торгон жолоогоо өргүүлж яваарай. Дараагийн удаа тухтай хуучилая. 

Г.Гал