Эрчүүдийн “Андгай”-г харуулна

Монгол омогшил хэмээн цээжээ дэлдэх зарим нэгэнтэй харьцуулахад жинхэнэ утгаар нь  өөрсдийгөө харуулдаг нөхөд бол эд юм. “Харанга”-ын Лхагваа, “Хар сарнай”-н Амраа, “Номин талст”-ын Дээгийгээс өөрийн эрхгүй энэ бүхэн “үнэртдэг” гэхэд хилсдэхгүй.  Тиймдээ ч тэдний уран бүтээлийг сонсох дуртай фенүүд дэндүү олон байдаг бизээ.  Энэ удаад “Андгай” өргөсөн ахан дүүс “Мөнх хөх тэнгэр мину” цомгийнхоо нээлтийг  энэ сарын 18-нд Улаанбаатар ресторанд хийхээр болжээ. Эрчүүдэд хаягласан энэ үдшийн тоглолтод тус цомгийн “Монголын нууц товчоо” , “Монгол нутаг мину”, “Монгол ээж” олны таашаалд хүрсэн бүтээлүүд эгшиглэх гэнэ.
 Мөн Лхагваагийн хамгийн “нялх найз” болох Монгол улсын хөдөлмөрийн баатар, Төрийн шагналт, Ардын жүжигчин Д.Лувсаншарав гуай азтай нэг үзэгчийг тодруулан сонин содон сюрпризийг барихаар зэхээд байгаа аж.  Хар шил, савхин хүрэм, буржгар үс, цагирган ээмэгтэй хэгжүүн эр Лхагваа санаснаа шулуухан л хэлчихдэг нэгэн. Хааяа бас хэдэрлэнэ. За бүр тайзан дээр ч хааяа хэгжүүн ааш гаргадаг ч магадгүй тэр аяг аашинд нь фенүүд хайртай байдаг юм шиг ээ. Найз нөхөд нь харин түүнийг жинхэнэ мужык гэж үнэлдэг юм билээ. Тэдгээр нөхдийнх нэг нь МУ-ын хөдөлмөрийн баатар, хөгжмийн зохиолч Лувсаншарав гуай гэдэг. Харин Лхагваа Лувсаншарав гуайг миний хамгийн “бяцхан найз” хэмээн өхөөрддөг юм.

П.Ундраа