“Тод магнай” сэтгүүлийн 41 дэх дугаар худалдаанд гарлаа

Малчны хотонд нялх төлийн дуу цангинаж, урин цаг ирснийг илтгэн цас ханзарч, өвлийг өнтэй давсан олны сэтгэлд нар хургасан өдрүүд үргэлжилж  байна. Хүн бүрийн сэтгэлийг хөвсөлзүүлсэн урин цагт түрлэг нэмж, “Тод магнай” сэтгүүлийн 41 дэх дугаар худалдаанд гарчээ. Сэтггүүлийн зочны хойморноо Төв аймгийн Сэргэлэн сумын уугуул, Монгол улсын Тод манлай уяач Ц.Хэнмэдэх уригдан “Хонгортоо хочгүй явна гэдэг монгол хүний зорилго нэрийн хуудас нь байсан юм уу даа” хэмээн сонирхолтой яриа өрнүүлсэн байх ажээ. Унаган адуугаараа наадан улсын тэр тусмаа дээд цолонд хүрсэн хийморилог нэгэн бол яах аргагүй л буурал уяач  гэдэгтэй хэн ч маргахгүй бизээ. Могой жил гарсаар хаврын бүсийн анхны уралдаан “Дүнжингаравын хурд 2013”, “Эрдэнэт хурд 2013” болж өнгөрсөн билээ. Уяачдын хувьд шинэ гарсан жилийн өнгийг тольдох томоохон уралдааны дээд гурван нас болон эрлийз ангилалд түрүүлж, айрагдсан морьдын цувааг, гэрэл зургийн хамтаар сэтгүүлийн шинэ дугаарт нийтэлжээ. “Тод магнай”-н “Уралдаан” буланд могой жилийн босгон дээр Тод манлай уяач цолны эзэн болсон “Алтай констракшн” ХК-ний захирал Х.Бат-Эрдэнийн мялаалга наадмын сурвалжлага багтжээ. Түүнчлэн “Дэлтэй цэнхэрээ дээдлэгч, далай ээжийн нутгаас...” хийсэн сурвалжлага “Дэлтэй цэнхэрийн хурд 2013”, Хэнтий аймгийн “Сэцэнханы хүлэг” МСУХ-ны нэрэмжит хаврын бүсийн уралдаан, “Булганхангайн хурд 2013”, “Бэлчирийн бүсийн уралдаан”, Сүхбаатар аймгийн аварга хүлэг шалгаруулах уралдаан, Дорнодын хаврын бүсийн уралдааны сурвалжлага, түрүүлж айрагдсан морьдын фотог багтаасан байгаа. Мэдээж уламжлал ёсоороо “Мэдэхэд илүүдэхгүй”, “Урт чихт”, “Дэлхийн морин спорт”, “Урлаг соёл”-ын булангууд шинэ сонин мэдээллээр дүүрэн байгаа ажээ.  1990-ээд оны эхэн үед ид шуугиулж, явсан хурдан хонгорын эзэн Хөвсгөлийн Д.Хишигбат  “Миний хонгор моринд ард түмний хүсэлтээр түрүүлсэн гэсэн бичиг медалийн хамт өгсөн”  хэмээн ярьж байна. Монгол орноо тойрон аялж, эрдэмт уяачид, хурдан хүлгэдийнх нь талаар хүргэж буй бид хаврын тэргүүн сарын шинэдээр хоймор нутаг Хөвсгөл рүү аяны замд гарсан билээ. Энэ үеэрээ аймгийн төвөөс 60-аад километрийн цаана өвөлжих Алдартыг зорин ярилцсан юм. Мөн 2012 оны ММСУХ-ны шилдэг 9 уяачийн нэг Т.Ихбаярын “Хүн адуу хоёр, хүлэг эзэн хоёр ижилсэх сайхан юм билээ” гарчиг бүхий ярилцлагыг шинэ дугаартаа багтаасан байгаа. Энэ мэт сониноор дүүрэн шинэ дугаараа “Тод магнай” уран бүтээлчид уншигчдадаа хаяглан илгээсэн байна. Сэтгүүлийн шинэ дугаарыг “Интер”, “Мир”, “Билэг” их дэлгүүрийн номын дэлгүүрүүдээр худалдаалж байна.  Мөн 9408-2992, 9406-2992 дугаарт холбогдон авч болох юм.