Е.Баасанхүү: Би удам дагасан малчин ардын хүүхэд

МУ-ын Ерөнхий сайдын ивээл дор, Монгол улсын шилдгийн шилдэг Уран уургач, Бугуйлч, Эмнэг хангал сургагч шалгаруулах “Адуучин” тэмцээний уран уургачийн төрөлд Дорноговь аймгийн Айраг сумын адуучин Е.Баасанхүү мөнгөн медаль хүртсэн бол нийлбэр оноогоор “айргийн гуравт” багтсан юм. Энэ жил 27 настай түүний энэ төрлөөр гаргасан амжилтын түүхээс сонирхуулахад “Адуучин” нэвтрүүлэгт гурвантаа оролцож байсан ажээ. Үүнээс 2009 онд Дорноговь аймгийн Дэлгэрэх суманд болоход мөнгө, 2010 онд Айраг суманд болоход хүрэл, 2011 онд Алтанширээд болоход алтан медалийг тус тус авчээ. Харин 2012 онд Батлан хамгаалахад туслах нийгэмлэгээс зохион байгуулдаг улсын аваргаас уургын төрлөөр гуравдугаар байранд орж байсан амжилтаараа ийнхүү нутгаа төлөөлөн шилдэг адуучидтай өрсөлдсөн  юм.  Тэрээр удам дагасан малчин ардын хүүхэд. Адууны дэлэн дээр дэрвэж өссөн Баасанхүү багадаа хурдан морины унаач явсан гэдэг. Аав сумын Алдарт уяач Төмөрчөдөрийнхөө уясан морьдыг унаж хурдлуулдаг байсан гэх бөгөөд мориноос хасагдах үеэсээ морь уях болсон гэнэ. Тэр бол 2003 он ажээ. Энэ хугацаанд нутгийнхаа унаган адуугаар наадаж, сум орон нутгаасаа тавь, жараад айраг түрүү хүртээд байгаа адуучин залуу сумын Алдартын болзлыг хангачихаад байгаагаа сонирхуулсан юм.

П.Ундраа