Хурдан морь унаач Б.Мөнгөншагай: Намайг магтахаар нь эмээдээ шагналынхаа мөнгөнөөсөө шоколадтай чихэр авч өгдөг

-Нүд нь гэрэлтсэн сэргэлэн хүү байна. Хурдан морь унаад удаж байна уу?
- Дөрвөн жил л болох гэж байна. Анх найман настайдаа хурдан морь унасан.
-Нэр хэн билээ. Аль сумын унаач вэ?
-Намайг Батсүхийн Мөнгөншагай гэдэг.  Тосонцэнгэл сумынх. Ноднин сумынхаа баяр наадмаар түрүү, аман хүзүү авсан. Энэ хөтөлж яваа халтар  хязаалан шүдлэндээ аман хүзүүдэж, азарга маань түрүүлсэн. Нээрэн тийм бас халтар үрээ маань сумандаа түрүүлсэн.
-Өнгөрсөн жил сайн нааджээ. Өөр ямар амжилт гаргаад байгаа вэ?
-Тосонцэнгэлдээ болдог өвлийн бооцоот уралдаанаас түрүү, аман хүзүү аваад, Ар сайр гэдэг газар очиж бас ахиад түрүү аман хүзүү авсан. Харин Эрдэнэбулган суманд уралдахдаа тойрог дээр ойчоод амжилт гаргаж чадаагүй.
-Гэмтэж бэртээгүй юу?
-Гайгүй ээ. Ах маань чи морио сайн унавал, сайн уяач болно гэсэн болохоор би хичээж байгаа.
-Онц сураад дарга болохыг хүсэхгүй байна уу?
-Үгүй ээ, морь уях чинь сайхан ш дээ. Мундаг уяач болбол хүмүүс хүндэтгээд гоё.
-Сурлагандаа хэр вэ. Шударгаар хариулаарай.
-Гайгүй ээ. Математик, технологи эд нар дээр гайгүй А авсан. Харин Монгол хэл дээрээ гайгүй ээ, С авсан.
-С тийм ч хангалттай үнэлгээ биш дээ.
-/инээв/
-Танай ангид чамаас өөр морь унадаг хүүхэд бий юу?
-Бас нэг охин байдаг. Энэ жил унаад нэгхэн айраг л авсан гэсэн.
-Ангидаа хэр өндөрт тооцогддог вэ?
-Би хамгийн намхан нь. Гэхдээ манай ангийнхан намайг дээрэлхдэггүй юмаа. Хурдан морь унахаас гадна би бас шатар гайгүй тоглодог. Бас кикбоксоор хичээллэдэг.
-Мөнгөншагай уралдааны замд ямар тактик баримталдаг вэ?
-Хамгийн чухал нь гараа. Гараа сайн бол тархинд гараад өөрийн мэдрэмжээрээ зайгаа аваад явдаг. Манай хамгийн том ах маш сайн унаач. Ах шигээ сайн унаач болохыг хүсдэг. Би одоогоор нэг түрүү, гурван аман хүзүү, хоёр айраг л аваад байгаа. /хуруу даран тоолж үзүүлэв/
-Морь унаад магтаалын үг хэр сонсож байна?
-Гайгүй ээ. Эмээ маань намайг морио сайн унаарай гэдэг. Би эмээгийнхээ даалгаврыг биелүүлээд сайн унахаар намайг магтдаг юм. Тэгэхээр нь би баярлаад эмээдээ шагналынхаа мөнгөнөөс шоколадтай чихэр авч өгдөг. Манай эмээ шоколадтай чихрэнд их дуртай. Ээж маань бас намайг миний хүү мундаг гэдэг.
-Дандаа түрүүлж айрагдахгүй шүү дээ. Тийм үед...
-Онцгүй шүү дээ. Миний дургүй хүрээд хоолоо ч  идэж чаддаггүй юм.
-Шартай эр байх нь ээ. Зарим нэг нь сантагаас морио түрүүлгэж өгөөч гэж хүсдэг юм билээ. Мөнгөншагай яадаг вэ?
-Би дотроо л тэгж бодоод орондоо залбирдаг.
-Ямар бэлэг авах юмсан гэж боддог вэ. Шагналд ирдэг цүнхэн дотор ер нь юу байдаг юм бэ?
-Хичээлийн хэрэгсэл л байдаг юм. Том цүнх байвал агаадаа өгчихдөг. Би дээрээ хоёр агаатай. Доороо нэг дүүтэй байсан чинь айлд өргүүлчихсэн. Авах дуртай бэлэг гэвэл дугуй л байна. Уяач маань надад гоё том дугуй авч өгнө гэсэн. Удахгүй авч өгөх байхаа.
-Ийм мундаг хүүд авч өгөх байх аа. Ярилцсанд баярлалаа. Унасан морьд нь хурдан байж, тод магнай торгон жолоогоо өргүүлж явахыг хүсье.