Унаач Т.Дэмидбаатар: Соёолон айрагдуулчихаад дүүтэйгээ бэлгээ хувааж идэх хамгийн гоё байсан

-Унаач байхын хамгийн гоё нь юу вэ?
-Би морь унах, унасан морьдоо түрүүлгэж айрагдуулах дуртай. Морьд гарч байгаа нь, эргэж байгаа нь хамгийн гоё гэж боддог. Гэхдээ бас хэцүү зүйл ч байдгийг нуугаад яахав. Хөөрчихсөн  морьдыг дагаж мордоод төвөг болохыг яана. Гэхдээ миний морьд хөөрдөггүй юмаа. Ганцхан хүрэн морь л хөөрөх гээд байдаг юм. Бас хүмүүс хөөгөөд байдаг. Харин зургаадугаар сарын 1-нд болсон уралдаанд төхөөрөмжнөөс гарч уралдсан болохоор гоё байлаа. Тэгээд өнөө хөөдөг хүмүүс байхгүй байгаа нь таатай санагдсан шүү /инээв/.
-Хэзээнээс морь унаж байгаа вэ?
-Би одоо долоон настай. Хоёрдугаар ангид сурдаг. Анх гурван настайдаа морь унаж сурсан. Аавынхаа ард сундлаад л эхэлж байлаа. Харин ноднингоос хурдан морь унаж байгаа. Түнэл сумын 60 жилийн ойн наадамд бор үрээгээ аман хүзүүдүүлж, их насны хүрэн морио 100 гаргаж давхиулсан. Бас Тосонцэнгэлийн наадамд хүрэн морио унаж уралдсан ч айрагдаагүй ээ.
-Эндээс хамгийн гоё нь аль наадам вэ?
-Мэдээж айраг түрүү хүртсэн наадам л хамгийн гоё нь шүү дээ. Миний хувьд Түнэлийн 60 жилийн наадамд соёолонгоо айрагдуулсан тэр мөч юм. Би тэндээс том ундаатай их гоё бэлэг авсан. Өөрөө хөдөлмөрлөж авсан бэлгээ дүүтэйгээ хуваагаад идэх мөн ч амттай байсан даа. Манайх гурван хүүхэдтэй айл. Би нэг эгч, нэг дүүтэй. Охин дүү маань одоо зургаан настай. Одооноос л морь унаж сурч байгаа. Харин эгч бол морь унадаг.
-Хэрвээ хүүхдээр морь унуулахаа больчихвол чамд ямар санагдаж байна?
-Мэдэхгүй ээ. Муухай л байх даа. Тэгвэл өөрийнхөө л морийг унах байх даа.
-Наадмын өмнөх орой унаач хүүхдүүд юу боддог вэ?
-Асуух юу байнаа. Маргааш миний морь хамгийн хурдан нь байгаасай гэж мөрөөдөнө шүү дээ. Тэгж бодохоор нойр ч хүрэхгүй. Жоохон унтахад  л түрүүлж байна гээд зүүдлээд эхэлдэг юм.
-Ярилцсанд баярлалаа. Дүүдээ амжилт хүсье.