Бөхчүүдийн тоглолт сайхан боллоо

А.Тэлмэн
2014 оны 3-р сарын 21 -нд

Монгол цэргийн өдрийг тохиолдуулан санаачлан зохион байгуулсан “Эр хүн танаа” бөхчүүд дуучдын нэгдсэн тоглолт сайхан боллоо.
Уртын дуучид “Эртний сайхан” дуугаар эхэлсэн тоглолт у.х Т.Өсөх-Ирээдүйн уншсан
“Жаргалын найман морины хатираанд жигүүрээ дэлгэсэн эр бор харцага
Жаргалтай дэлгэрийн уран нугалаанд хар гунигаа аадалсан эр бор харцага
Зэрлэг салхины урсгалд харин ч дуртай эр бор харцага
Зэлүүд талынхаа аялгуунд даанчиг дассан эр бор харцага
Жин жингийн алхаанд цуцаа нь үгүй эр бор харцага
Жил жилийн урсгалд гундаа нь үгүй эр бор харцага
Гучин гурван шаргын жороонд нь дуртай эр бор харцага
Гурван хөх мөрний атираанд нь хайртай эр бор харцага
Цэггүй өндөрт гарлаа чиг үүрэндээ эргэдэг эр бор харцага
Чиггүй холд одлоо чиг нутагтаа хоргодог эр бор харцага
Дутуу дуулж болдоггүй ардын дууны эр бор харцага
Дундуур хайрлаж болдоггүй амин зүрхний эр бор харцага” хэмээх яруу найрагч Б.Ичинхорлоогийн сайхан шүлгээр хөглөгдөж улсын начин,Соёлын гавьяат зүтгэлтэн Содномын Эрхэмбаярын уянгат дуугаар амилсан юм. Начны удаагаар аймгийн арслан М.Баярсайхан, цэргийн арслан Д.Баттогтох нарын Завхан нутгийн арслангууд ая дуугаа өргөсөн бол мөн Завхан нутгийн хүү, аймгийн арслан Жамбажамцын Сүхбат үзэгчдийг ихэд хөгжөөж хөөрсөн үзэгчид ч арсланг урамшуулж ахин дуулуулж байлаа. Үүний дараагаар улсын өсөх идэр начин И.Ёндонсамбуу, улсын начин С.Багахүү нарын “дуучин” бөхчүүд ая дуугаа өргөж, үзэгчдийн хүсэлтээр дахин дуулцгаав.
Аварга дунд сургуулийн сурагчид Монгол бөхийн уламжлалт гараа дэвээ, шаваа, барилдааны ёсонг харуулсан үзүүлэх тоглолт хийсэн нь үзэгчдийг уухайлуулж, нүдийг сэргээж сэтгэлийг баясган байв.
Энэ хүүхдүүдийн дараа Булган аймгийн Рашаант сумын харьяат, аймгийн начин Найдансүрэнгийн Тулга МУГЖ, дуучин С.Жавхлангийн дуулсан “Чамд дурлачихаж би”, дуучин Д.Намсрайноровын дуулсан “Дурлан дурлан хайрламаар” дуунуудыг дуулж бөхийн өргөөг нураах шахав. Үнэхээр түүнийг дуулахад үзэгч олон уухайлан дэмжиж байлаа. Үзэгчдийн хүсэлтээр дахин нэг дуу дуулсан агаад тэрхүү дуу нь дуучин Л.Болдбаатарын дуулсан “Намирын гол” хэмээх сайхан дуу байлаа. А.н Н.Тулгын хувьд үнэхээр хоолойн чадалтай, чадварлаг дуулдаг болохоо үзэгч ололндоо батлан харуулав. Мөн Завхан аймгийн заан Г.Батцэрэн, Булган аймгийн начин Ө.Сүхбат нар аргагүй чадварлаг дуучин болохоо харуулж үзэгч олноос өндөр үнэлэлт авав. Хурц арслан Ш.Шинэбаяр эвлэгхэн дуулж үзэгчдийн сонорыг мялаасан бол Дундговь аймгийн арслан О.Өлзиймөнх, Архангай аймгийн харьяат, цэргийн заан Д.Алтаншагай нарыг дуулахад бөхийн өргөөнд цугласан олон удтал алга ташин байлаа. Энэхүү тоглолтын нээлт болсон хүн нь Дундговь аймгийн Эрдэнэдалай сумын заан Г.Эрдэнэ-Очир байв. Түүний чадалтай хоолойг үзэгч олон үнэхээр бахадсан бөгөөд мэргэжлийн дуучид ихэд сонирхож байв. Бөхчүүдээс гадна дуучин М.Бямбажав, Х.Батмэнд, Бо.Батболд, Ба.Батболд, Л.Нарантуяа, М.Отгонгэрэл, Д.Бурмаа, уртын дууч с.з Б.Мөнхбаатар нар уригдан оролцов. Энэхүү тоглолтыг жил дараалан амжилттай зохион байгуулсан үндэсний бөхийн улсын ахлах тайлбарлагч Б.Цогтбаатаг, А.Ганболд, улсын тайлбарлагч С.Гантөр нартаа талархаж баярласнаа үзэгч олныхоо өмнөөс хүргэе.
МУИС-ийн оюутан Т.Түмэндэмбэрэл

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна