Нийслэлийн Алдарт уяач Г.Буянтогтох: Өвөл хурдан байсан морь зун давхил нь бэлэн байдаг

“Дүнжингаравын хурд-2014” уралдааны их насанд Өмнөговь аймгийн Цогт-Овоо сумын уяач Төгөлдөрийн буурал морь тод магнай, торгон жолоогоо өргүүлсэн билээ. Өнөө жил энэ хурдан буянг Төв аймгийн ? сумын уугуул, нийслэлийн Алдарт уяач Ганбаатарын Буянтогтох уяа сойлгыг нь тааруулж байгаа аж. “Дүнжингаравын хурд-2014” уралдааны үеэр түүнтэй уулзаж сэтгэгдлийг нь сонссон юм. 
-“Дүнжингаравын хурд”-д сайхан наадлаа, баяр хүргэе?
-Баярлалаа. Модон морин жил гараад Дүнжингарав тодорхой шалтгаанаар хойшлогдож байсан ч сайхан болж их морьтүрүүлгэсэндээ их баяртай байна.
-Буурал морины удам угшил, мөн хэзээнээс тан дээр уягдсан бэ?
-Сүхбаатар аймгийн Сүхбаатар сумын Одхүүгийн унаган адуу. Өмнөговь аймгийн Цогт-Овоо сумынТөгөлдөр гэж залуугийн морь л доо. Энэ жилээс би уяа сойлгыг нь тааруулж байгаа юм.
-Дүнжингаравын уралдаанд хэдэн морьтой ирэв. Наадмын тов олон гарсан шүү дээ?
-Өвөл наадмаа болно гээд 16 морьтой ирчихсэн байсан ч Дүнжингарав тодорхой шалтгааны улмаас хойшлогдохоор нь очоод морьдоо тавьчихсан байсан. Болж магад гэхээр нь цөөхөн хэдэн адуу барьж тавиад байсан нь оносон байна лээ. Би хөдөө байсан болохоор наадмын товыг сүүлд сонссон. Ер нь хүн бүхэн л тулгаж зарласан гэж байна. Энэ удаад найман морьтой ирсэн. Буурал морио түрүүлгээд, хавчиг халзан морь 11-д, дөлгөөн хонгор морь 20 хэдээр, хоёр соёолон маань 9 болон 11-ээр давхилаа.
-Наадмын зохион байгуулалтын талаар таны бодол?
-Энэ олон түмнийг ингэж цэнгүүлнэ гэдэг олон хүний хүч хөдөлмөр, бие сэтгэл шингэж байж бий болж байгаа. Мэдээж бүх хүний сэтгэлд нийцнэ гэж байхгүй. Түмэн олон ам сайтай байна, тэгэхээр сайхан болж байна гэсэн үг.
-Хавар оройхон болж байна. Таны бодлоор давуу болон сул тал нь юунд байна?
-Дөрөвдүгээр сар гэдэг жаахан хатуу сар таарч оройтож байгаа юм. Адууны тамир их шаардаж байгаа. Хаврын эхэн сардаа зохион байгуулвал шороо тоос багатай, цасны тахан дээр хийвэл сайхан байдаг. Энэ жил биднээс шалтгаалсангүй, хэн нэгний буруу биш, малын гоц халдвар өвчнөөс болоод хойшилсон ч сайхан л боллоо.
-Зарим хүн хаврын уралдааныг бүр хорих талаар ч санал гаргаж байна. Таны хувьд ямар бодолтой явдаг вэ?
-Хаврын уралдаан урьд ч байсан, одоо ч уралдах хэрэгтэй. Уралдах замаа сайхан засаад, хүүхдийнхээ аюулгүй байдлыг л сайн хангаад уралдахад болохгүй зүйл байхгүй. Өвөл хурдан байсан морь зун давхил нь бэлэн, хурдан байдаг. Өвлийн уралдааныг би хувьдаа бол дэмждэг.
-Ярилцсанд баярлалаа. Ялгуусан хэмээх модон морин жилдээ сайхан наадаарай.
-“Тод магнай” сэтгүүл, сайтын хамт олон болон Монголынхоо бүх ард түмэнд эрүүл энх, сайн сайхныг хүсье.
Ц.Амарбаяр