Э.Тамир: Уяачийн хөдөлмөр нарийн мэдрэмж шаарддаг

Их Монгол Улс байгуулагдсаны 808, АХ-ын 93 жилийн ойн төрийн их баяр наадамд халзан азаргаа айргийн гурваар давхиулан амжилтаа ахиулсан морины зүтгэлтэн нэгэн эрхмийн сэтгэгдлийг хүргэж байна. Энэ бол Э.Тамир юм.

-Хүрэн халзан азарга амжилтаа ахиулан АХ-ын 93 жилийн ой төрийнхөө их баяр наадамд айргийн гурваар хурдаллаа. Баяр хүргэе?
-Баярлалаа. “Тод магнай” сэтгүүлээрээ дамжуулаад Монголынхоо ард түмэнд баяр наадмын мэндчилгээ дэвшүүлье. АХ-ын 88 жилийн ойгоор миний Ардчилал хүрэн даага төрийнхөө наадамд түрүүлж байсан бол өнөө жил хүрэн халзан азарга маань айргийн гурваар давхилаа. Сэтгэл өндөр байна.
-Өнгөрсөн жил уг нь хүрэн азарга хурдан байсан даа?
-Тиймээ, хавар “Дүнжингаравын хурд”-д аравлаад, улсын наадамд наймлаж, “Их хурд”-д арваар давхисан. Энэ жилийн хувьд хүрэн халзан азарганы уяаг Тод манлай уяач С.Ганхуяг тааруулсан. Ардын хувьсгалын 88 жилийн ойн баяр наадмаас хойш сайн залуу уяачтай болъё хэмээн зорьж, хэд хэдэн хүнд Тод манлай уяачдаар уяаны эрдэм заалгасан. Гэхдээ морь уяна гэдэг хэн дуртай нь хийчихдэггүй, нарийн мэдрэмж шаарддаг учраас төдийлөн амжилтанд хүрээгүй ээ. Морь уяж амжилт гаргана гэдэг нь жилийн дөрвөн улиралд адууныхаа дэргэд байдаг, морио мэдэрдэг хүнд л тохиодог юм байна гэдгийг өнгөрсөн таван жилийн хугацаанд мэдэрлээ. Хүрэн азарга уралдсан болгондоо тархины адуутай уралддаг. Тэгсэн хэр нь үзүүр дээрээ унжчихаад байдаг байсан. Тэгээд өнгөрсөн өвөл Тод манлай уяач Бандгай Ганхуяг дээр адуугаа аваачиж өгөөд энэ сайхан амжилтыг гаргалаа. Энэ дашрамд Ганхуяг Тод манлайдаа баярласнаа илэрхийлье.
-Азарга айрагдлаа. Бусад нас яаж давхисан бэ?
-Ганц азарга л уясан. Тэр маань айрагдлаа. Ирэх жилээс унаган адуунуудаараа наадна даа. Нэгэн үе адуу сайн цуглуулсаан. Одоо түүнийхээ үр шимийг амсана даа.
-Алдарт хүрэн азарганы төл л лав бий?
-Тиймээ, Тод манлай уяач Алтангэрэлийн хүрэн азарганы төл бий. Уяач хүн унаган адуугаараа наадах хамгийн том бахархал гэдэг. Миний унаган адуунууд улс, бүсийн наадмаас түрүү, айраг хүртэж байсан л даа.
-Ингэхэд улс, бүсийн наадмаас хичнээн айраг, түрүү хүртээд байгаа вэ?
-Долоо, найман айраг, түрүү бий байх шүү.
-Бизнесмен, улс төрч уяачдын талаар таагүй яриа чих дэлсэх болсон. Нийгмийн энэ чиг хандлагыг хэрхэн эерүүлэх ёстой юм бол?
-Сүүлийн үед манайхан нэг зүйлд их гаршаад байгаа нь аливаа зүйлийг шүүмжлэх. Тэр тусмаа юм хийж бүтээж байгаа нэгнээ харлуулах гэж оролддог. Дэлхий нийтээрээ даяаршиж байгаа энэ үед бид ёс заншил үндэсний уламжлалаа хадгалж, хойч үедээ өвлүүлэн үлдээхэд анхаарах ёстой. Туурга тусгаар улс байхын амин сүнс нь өөрийн гэсэн зан заншил, өв соёлтой түүнийгээ ард түмэн нь эрхэмлэн дээдэлдэгт байдаг. Ний нуугүй хэлэхэд сүүлийн үед нийгмийн амьд харилцаа хүртэл үгүйлэгдэж байна шүү дээ. Хүүхдүүд нь гар утас, компьютерээс салахгүй, дээр нь харь орны загвар моода хөөн чамирхаж, үндэсний гэсэн болгоноо өөлж шүүмжилдэг. Ийм үед харин ч муу сайнаар хэлэгдээд байгаа тэр бизнесменүүд, уяачид, хурдан мориныхон л үндэсний өв соёлоо дээдлэн, авч үлдэхээр чармайж байгаа. Тиймээс аливаа зүйлд хэт туйлшралгүй олон талаас нь харах хэрэгтэй.
-Энэ жил уугуул нутагт тань баруун бүсийн даншиг наадам болно. Халзан азаргаа уралдуулах уу?
-Уралдуулахгүй ээ. Хурд нь танигдчихсан адууг наадам болгонд уралдуулаад байх шаардлагагүй. Ер нь уяач хүн адуугаа хайрлаж, гамнан олон жил уралдуулан наадамчин олноо баярлуулах хэрэгтэй. Гэхдээ нутгийнхаа ойд сайхан баярлана аа.
-Сайхан наадаарай.
-Баярлалаа.

У.Долгормаа