Залуу хүчтэнүүд хүч түрсэн Завхан аймгийн наадам

Завхан аймгийн бөхчүүд өнөө жилийн улсын баяр наадмаар тун одтой сайхан наадсан билээ. Тэд Отгонтэнгэр хайрханыхаа өвөр бэлд нэгдсэн бэлтгэл сургуулилтад гарч түүнийхээ үр шимээр аль ч газар одтой сайхан наадаж байна. Сүүлийн жилүүдэд бөхийн өргөөнд болж буй сумын заан залуучуудын барилдаанд Завхан нутгийн залуус тун ч сайн барилдах болсон. Тэдгээр залуус өнөө жил нутгийнхаа наадамд тун сайхан барилдаж ихэнх нь цолд хүрчээ. Завхан аймгийн наадамд у.х М.Дармаабазар, у.н Г.Бат-Амгалан нараар манлайлуулсан хүчит 256 бөх зодоглосон бөгөөд Их-Уулын Батцэнгэлийн Чимэдвандан найм даван түрүүлж аймгийн арслан болсон бол Отгон сумын харьяат, бөхийн хиц галбир тун сайхантай Төрмөнхийн Бэгзсүрэн харцага үзүүрлэж аймгийн заан болжээ. Их шөвөгт Хэнтийд харцага цолд хүрсэн Дамдинпүрэвийн Бат-Эрдэнэ, чөлөөтийн Пүрвээгийн Өсөхбаатар нар шалгарсан байна. Ийнхүү Ургамал сумын харьяат, Хилийн цэргийн 0277-р анги, Босоо хүлэг компаний бөх, чөлөөт бөхийн ОУХМ Пүрвээгийн Өсөхбаатар аймгийн харцага цолд хүрчээ. Мөн Завханы сумдад 10 гаруй түрүүлсэн Алдархааны Зэсрэндондовын Хангалбаатар, бөхийн өргөөний сумын заануудын барилдаанд хамгийн олон шөвгөрсөн Нөмрөгийн Ёндонпэрэнлэйн Улсболд нар аймгийн начин цолд хүрсэн байна.
Завхан аймгийн наадам өнөө жил шударга сайхан болсон бөгөөд шилдэг сумын заан Тогтохын Хайдавдорж дөрвийн даваанд унасан бол Төрмөнхийн Бэгзсүрэн тавын даваанд өөрийн төрсөн дүү Төрмөнхийн Дүгэрдоржийг амлаж давжээ. Хэдийгээр дүүгээсээ өөр хүн амлаж болох ч ах дүү хоёрын аль аль нь баттай давахыг хэлж мэдэхгүй, мөн хоёул унахыг ч үгүй гэх газаргүй тул Бэгзсүрэнгийн энэ шийдвэр тун зөв шийдвэр байсан болов уу. Төрийн наадмын түүхэнд ийм тохиолдлууд цөөнгүй байдаг. Ойрын жишээ дурдахад 2001 оны наадмын 6-ийн даваанд у.г И.Доржсамбуу тухайн үед у.н цолтой байхдаа 6-ийн даваанд шинээр начин цолд хүрсэн өөрийн төрсөн дүү Ёндонсамбууг амлаж давсан байдаг. Улмаар улсын заан цолд хүрч байсан сайхан түүх бий. Мөн 2006 оны наадмын 3-ын даваанд у.н Д.Азжаргал өөрийн төрсөн ах а.а Д.Түмэнжаргалыг 3-ын даваанд амлаж давжээ. Ахын хишгээр ч тэр үү дүү нь улсын арслан хэмээх сайхан цолд хүрсэн түүхтэй. Тиймээс Бэгзсүрэнгийн энэ шийдвэр их зөв шийдвэр хэмээн санагдаж байна. Дүгэрдоржийн хувьд цаашид улам бүр өсөх сайхан барилддаг залуу юм. Мөн Завхан аймагт Их-Уулын Ренчинсамбуугийн Батсүх, Цагаахайрханы Батын Даваадорж нар ахин 5 давж эрэмбээ ахиулжээ. Тэд аймгийн наадмын 3 дахь шөвгөө авч буй нь энэ юм.
Оноолтыг 5-ын даваанаас үзнэ үү. /тойргийн цолоор/
Тавын даваа
1. М.Дармаабазар у.х – П.Өсөхбаатар с.з
2. Г.Бат-Амгалан у.н – З.Хангалбаатар с.з
3. М.Баярсайхан а.а – Ё.Улсболд с.з
4. Р.Батсүх а.з – Г.Чойжамц с.з
5. Б.Чимэдвандан а.х – Г.Анхбаяр с.з
6. Т.Бэгзсүрэн а.х – Т.Дүгэрдорж с.з
7. Ш.Чинтулга а.х – Б.Даваадорж а.н.н
8. Д.Бат-Эрдэнэ а.х – П.Батсүх а.н.н
Зургаагийн даваа
1. Р.Батсүх а.з – П.Өсөхбаатар с.з
2. Б.Чимэдвандан а.х – З.Хангалбаатар с.з
3. Т.Бэгзсүрэн а.х – Ё.Улсболд с.з
4. Д.Бат-Эрдэнэ а.х – Б.Даваадорж а.н.н
Долоогийн даваа
1. Б.Чимэдвандан а.х – П.Өсөхбаатар с.з
2. Т.Бэгзсүрэн а.х – Д.Бат-Эрдэнэ а.х
Наймын даваа
1. Б.Чимэдвандан а.х – Т.Бэгзсүрэн а.х

Т.Түмэндэмбэрэл