Аймгийн Алдарт уяач Д.Баясгалан: Сайхан хурдалж, хоёулаа бараг зэрэгцээд л орсон

-Төрөлх нутгийн тань ой дэлгэр сайхан болж байна уу?
-Сайхан болж байнаа. Монголын анхны сумдын нэг Булган аймгийн Хангал сумын түүхт 90 жилийн ой өнөөдөр /7-р сарын 19/ болж байна. Бороо хургүй сайхан сэрүүн талдаа, наадамчин олонд таатай сайхан өдөр байна. Сумын ой зочид төлөөлөгч ихтэй, газар газрын уяачид цугласан өтгөн сайхан болж байнаа. Өнөөдөр азарга, их нас, шүдлэн уралдлаа.
-Суман хүрэний эзэн нутгийнхаа ойд морь мордуулав уу?
-Мордууллаа. Шүдлэн түрүүлж, азарга, их нас гурваар давхилаа. Маргааш ахиад гурван насны морьд уралдана. Хангал сумын ойн нэг онцлог нь эрлийз гурван насны морьд уралдана. Сум орон нутгийнхан маань ойдоо зориулж олон бүтээн байгуулалтууд хийсэн байна. Төрийнхөө наадамд долоо түрүүлсэн МУ-ын Даяар дуурсагдах Далай Даян Дархан аварга Бадамзоригийн Түвдэндорж агсны 130 сая төгрөгийн өртөг бүхий маш сайхан хөшөө бүтээж.Тэрхүү хөшөөний нээлт боллоо. Ер нь баяр наадам өргөн дэлгэр сайхан болж байна. 
-Хүрэн морио мордуулаач гэсэн хүсэлт ирэв үү?
-Хүрэн морь төрийнхөө баяр наадамд амжилттай сайхан давхиж нутаг орныхоо нэрийг гаргалаа. Бүсийн уралдаанууд хүлээж байгаа учраас заавал энд уралдуул гэхгүй ээ. Түүндээ л амжилттай сайхан давхиулж, нутаг орныхоо нэрийг өндөрт өргөөрэй гэсэн. Харин Хангал сумын ард иргэд маань хүрэн морийг хармаар байна гэсэн учраас наадмын нээлтэнд оролцуулж,  төв цэнгэлдэхээ нар зөв тойруулан наадамчин олондоо харууллаа.
-Суман хүрэнг улсын наадамд бараг л түрүүлчихэв үү гэж бодсон шүү?
-Бид ч гэсэн түрүү юу, аман хүзүү юу л гэж бодсон. Гэхдээ тэр хул морь сайхан хүлэг байна лээ. Алтан туурайтыг юу гэхэв. Манай Цэрэнжав сайн уясан байна лээ. Сайхан хурдалж хоёулаа бараг зэрэгцээд л орсон. Тод магнай сэтгүүлээр дамжуулаад нэгэн санал хэлэхэд хурдан морины уралдааныг хэмжиж байгаа одоогийн багаж хэрэгсэл, техниктээ  жаахан анхаарахаар болж. Уг нь бол маш нарийн хэмжиж гаргах ёстой. Олимпод бол секунд, долиор нь нарийн хэмжээд адилхан амжилт үзүүлсэн бол хоёуланд нь алтан медаль өгдөг шүү дээ. Тэрэн шиг үнэхээр зэрэг орсон бол амжилтыг нь адилхан үнэлэх хэрэгтэй. Энэ бол миний санаа биш. Хүрэн морийг дэмждэг наадамчин олны санал юм шүү. Гэхдээ төрийн наадам түвшин сайхан боллоо.
-АХ-ын 93 жилийн ойд Суман хүрэнгээс гадна хичнээн насны морьтой ирсэн бэ?
-Би ганцхан морьтой очсон. Уг нь өнөөдөр айрагддаг азарга маань хурдан сайхан л байсан юм. Би Бразилд яваад 12 хоног хөл бөмбөгийн ДАШТ-ийг үзсэн учраас наадам тулгаж ирлээ л дээ.
-Дараагийн уралдаанаа хаана хэмээн төлөвлөж байна?
-Хөвсгөл явж Хотгойдын хурдад уралддаг юм уу санаатай байна. Газар нутгийн хувьд ойрхон. Дээр нь өвс ургамал, цаг агаар ойролцоо шүү дээ.
А.Тэлмэн