Г.Шүрэнчулуун: Нүүдэлчин ахуйгаа дэлхий даяар сурталчилсан гайхамшигт дурсамж юм

Дэлхийн дээд амжилтанд бүртгүүлсний нэг жилийн ой, уяачдын өдөрлөгийн үеэр Говьсүмбэр аймгийн МСУХ-ны тэргүүн Г.Шүрэнчулуунтай ярилцсанаа хүргэж байна.
-Морьтон монголчууд нэг дор дэлхийн дээд амжилтанд хоёр төрлөөр бичигдэн  морин спортын түүхэнд мөнхөрсөн.  Тэрхүү үйл явдлын нэг жилийг ойн арга хэмжээний талаар ямар бодолтой байгаа вэ?
-Энэ бол монгол түмний, малчин ардын сэтгэлд хамгийн тод үлдсэн гайхамшигт дурсамж юм. Монголчууд нэгэн зэрэг дэлхийн хоёр дээд амжилтыг тогтоож, нүүдэлчин ахуйгаа дэлхий даяар сурталчилан эвлэлдэн нэгдсэн цагтаа юуг ч бүтээж чаддагийг харуулсан түүхэн үйл явдал юм. Энэхүү амжилтыг дахин тогтоох боломжгүй ч байж мэднэ шүү дээ. Тиймээс энэ түүхэн үйл явдлын гэрч болж, нутгийнхаа уяачдыг уриалан оролцсон явдлаа түүхэнд үлдэх завшаан хэмээн ойлгож байгаа.
-Өнгөрсөн жилийн арга хэмжээнд Говьсүмбэр аймгийн МСУХ ямар бүрэлдэхүүнтэй оролцож байсан бэ?
-Манай аймгаас 100 гаруй морьтон жагсаж, 60 гаруй морь уралдан дөрвөн үеийн уяач Цэлхээгийн Бямбасүрэнгийн хүрэн азарга айрагдан монголчуудын тэр тусмаа Говьсүмбэрчүүдийн магнайг тэнийлгэж, омогшлыг төрүүлсэн. Дээрээс нь манай Говьсүмбэр аймгийн уяачдын морьд бүгд 100 дотор орж, 4000 гаруй хүлгийн өмнө давхисан гэдэг нь бас их өндөр амжилт гэж үзэж байгаа. Ер нь тэрхүү түүхэн үйл явдалд Говьсүмбэрийн уяачид амжилттай сайн оролцсон. Харин өнөөдөр нэг жилийн ойн арга хэмжээнд Говьсүмбэр аймгийн МСУХ-ны тэргүүлэгчид, баруун Чойрын хийдийн  Да лам Мөнхбат болон “Боржигон” чуулгын хөгжимчид, дуучид хүрэлцэн ирсэн. Да лам Мөнхбат маань "Сүмбэр хурд" гал уяаны гишүүн, аймгийнхаа МСУХ-ны тэргүүлэгчээр ажилладаг. Саарал морь нь аймаг, бүсийнхээ наадамд их хурдалж байгаа.
-Боржигон уртын дуу өөрийн гэсэн өнгө аястай хэмээдэг. Түүнийг уяачдадаа мэдрүүлсэн юмаа даа?
-Тийм шүү. Боржигон уртын дуу бол маш их урт шад шүлэгтэйгээрээ ялгардаг. Найр наадамд их дуулагддаг дуу л даа. Сүүлийн үед харин төгс мэддэг хүн хүмүүс ховордоод байгаа юм. Боржигон морин хуур гэхэд арьсан наартай, урт иштэй, том морин толгойтой дуугаралт, ая дан зэрэг нь энгийн хуурнаас өөр. Манай Говьсүмбэр аймгийн “Боржигон” чуулга бол Боржигон уртын дуу, морин хуурынхаа дахин давтагдашгүй өвөрмөц онцлогийг түгээж, өв соёлоо хадгалж явдаг хамт олон юм. Тэр утгаар нь өнөөдрийн арга хэмжээнд урьж оролцуулан Монголын уяачдад бэлэг барилаа.
-Морин жилийн уралдаанууд отголж байна. 2014 онд Говьсүмбэрийн уяачид ямар амжилт гаргав?
-Улс бүсийн наадмаас хараахан айраг авсангүй. Харин манай аймгийн наадамд ирж уралдаад дараа нь өөр аймаг, цаашлаад бүсийн уралдаанд амжилт гаргасан морьд цөөнгүй байлаа.
-Ярилцсанд баярлалаа. Цаашдын ажилд тань амжилт  хүсье.
А.Тэлмэн