Д.Мөнх-Эрдэнэ: Манай аймгаас гурван хүн МУ-ын Алдарт уяач цолны болзол хангаад байна

Дэлхийд дээд амжилт тогтоосны нэг жилийн ойн арга хэмжээний үеэр 2013 оны ММСУХ-ны шилдэг салбар “Хонгорын хурд” МСУХ-ны тэргүүн Д.Мөнх-Эрдэнээс цөөн асуултанд хариулт авлаа.

-Монгол адуугаа дэлхийн дээд амжилтанд бүртгүүлэх түүхэн үйл явдалд хонгор нутгийн уяачид хэрхэн оролцсон бэ?
-Монгол морио дэлхийн дээд амжилтанд бүртгүүлэх түүхэн үйл ажиллагаанд Баянхонгор аймгийн морин спорт уяачдын холбоо өргөн бүрэлдэхүүнтэй оролцсон. Зөвхөн морьтны жагсаалд л гэхэд 300 гаруй морьтон жагссан. Мөн та бүхэн бэлхэнээ санаж байгаа байх. Дэлхийн дээд амжилтанд бүртгүүлэх 4249 морины уралдаанд Баянхонгор аймгийн Баян-Овоо сумын уугуул Цэндийн Энхтайваны хонгор халзан морь түрүүлж бахдам сайхан амжилтын эзэн болсон шүү дээ. Хонгор нутгийн хийморийг өргөсөн Энхтайван уяачаараа, хонгор халзан мориороо нутгийн түмэн нь одоо ч гэсэн бахдан бахархаж байна. Ер нь өнгөрөгч 2013 он “Хонгорын хурд” МСУХ-ны хувьд амжилт бүтээл арвинтай байж, ММСУХ-ны оны шилдгийн шилдэг салбараар шалгарсан шүү дээ.
-Өнөө жил ч гэсэн ажил ихтэй байсан байх. Засгийн газрын тогтоолт “Говийн бүсийн” хурдан морины уралдаан Баянхонгор аймагт зохион байгуулагдсан шүү дээ?
-Тиймээ. Энэ жил манай холбоо Монгол Улсын Засгийн газрын тогтоолоор зохион байгуулагддаг говийн бүсийн уралдааныг бие даан амжилттай зохион байгуулсан. Энэхүү уралдаанд нийт 16 аймгийн 92 сумын уяачид оролцож, есөн насны 900 орчим хурдан хүлэг шандас шалгалаа. Тэр дундаа Баянхонгор аймгийн уяачид нутагтаа болсон бүсийн уралдаанд амжилттай оролцож дөрвөн түрүү, дөрвөн аман хүзүү, найман айраг хүртэн, гурван уяач Монгол Улсын Алдарт уяач цолны болзлыг хангасан явдал үнэхээр бахархалтай байлаа. Ирэх 2015 онд ч гэсэн “Хонгорын хурд” МСУХ ажил ихтэй байна байх. Учир нь ирэх жил манай холбооны санаачилгаар зохион байгуулагддаг аймгийн хурдан морьдын чансааг тодорхойлох “Хонгорын шигшмэл хурд-2” уралдаан маань зохион байгуулагдана. Одооноос бэлтгэл ажил нь эхэлж байна.
-Ажил үйлс нь өөдрөг бүтэмжтэй байгаа танай хамт олонд амжилт хүсье.

А.Тэлмэн