Ө.Мэнд-Амар: Үйл ажиллагаагаа улам өргөжүүлэн амжилтаа ахиулахын төлөө ажиллана

Сүхбаатар аймгийн Эрдэнэцагаан сумын “Егүзэрийн хүлэг” МСУХ 2014 онд удирдлага зохион байгуулалтын шинэчлэл хийж, холбооны тэргүүнээр Ө.Мэнд-Амар сонгогдсон юм. Албаа аваад удаагүй байгаа шинэхэн тэргүүнээс цөөн асуултанд хариулт авлаа.
-Сумын ой гээд шинэхэн тэргүүн албаа хүлээж аваад л ажилд дарагдсан бололтой?
-2014 оны нэгдүгээр сард манай холбоо удирдлага зохион байгуулалтын өөрчлөлт хийж, олон жил тэргүүнээр нь ажиллаж,  амжилт бүтээлээр дүүрэн авч явсан Ч.Бямбажав ахаасаа энэхүү албыг нь хүлээн авсан. Одоо манай холбоо 11 тэргүүлэгч, 104 гишүүнтэйгээр үйл ажиллагаагаа явуулж байна. Ажлаа авсан даруйдаа тэргүүлэгчдээрээ хуралдан өнгөрсөн оныхоо ажлыг дүгнэж, уяачдынхаа амжилт бүтээлийг үнэлэн сумын Алдарт уяач найм, оны шилдэг уяач нэг, оны шилдэг унаач гурван хүүхдийг шалгаруулсан. Мөн уяачдынхаа холбооны санаачилгаар “Егүзэрийн хүлэг” МСУХ-ны нэрэмжит “Аварга хүлэг” шалгаруулах бага гурван насны морьдын уралдааныг зохион байгуулсан. Тэгэхдээ бай шагналыг нь өндөр байлгах үүднээс шинэ төрсөн найман Алдарт уяачтайгаа ярилцаад тус бүр нэг сая төгрөгөөр ивээн тэтгэхээр болгосон юм. Энэ нь их зөв шийдэл байсан гэж бодож байна. Түүнчлэн хавар сургууль төгсөлтийн үеэр хурдан морь сайн унаж байсан гурван хүүхдийг шагнаж урамшуулсан.
-90 жилийнхээ ойн баяр наадамд Эрдэнэцагааны уяачид амжилт арвинтай наадсан байна лээ?
-Хоёр аймаг, 10 гаруй сумын уяачид ирж наадсан 90 жилийн ойн баяр наадмаас манай уяачид дөрвөн түрүү, 12 айраг хүртэн хоёр хүн сумын Алдарт уяач цолны болзол хангасан. Ойн баяр наадмын хурдан морины уралдааныг амжилттай зохион байгуулахад сумын ЗДТГ, Эрүүл мэндийн төв, Цагдаагийн тасаг, сургуулийн нийгмийн ажилтан, даатгалын байгууллагууд  нягт хамтран ажилласныг зориуд хэлэх  байна. Ийнхүү хамтарч ажилласны үр дүнд уралдаан маань будлиангүй сайхан болсон. Мөн манай холбооны морины төлөө гэсэн чин сэтгэлтэй тэргүүлэгч залуучууд маань их идэвхтэй оролцсон.
-Цаашид хийж хэрэгжүүлэх гэж буй ажлуудаасаа товч танилцуулаач?
-Холбооныхоо үйл ажиллагааг  улам бүр өргөжүүлэн, уяачдаа улс аймаг, бүсийн уралдаанд тогтмол амжилттай оролцуулахаас эхлээд хэд хэдэн зорилт дэвшүүлээд байгаа. Жишээлбэл “Егүзэр” адууны амжилтыг  өсгөхийн тулд Хэнтий, Дорнод адуугаар цус сэлбэн сайжруулах. Цаашлаад холбооныхоо гишүүдийг идэвхжүүлэх зорилгоор залуу уяачдын уулзалтыг зохион байгуулах. Хурдан морь цоллооч бэлтгэх зорилгоор дунд сургуулийн хүүхдүүдийн дунд тэмцээн зохион байгуулах. “Егүзэрийн хүлэг” МСУХ-ны веб сайтыг нээж мэдээ мэдээллээ шуурхай хүргэх  гэх мэт олон зүйлийг хийхээр төлөвлөж байна даа.
-Ажилд нь амжилт хүсье. Ярилцсанд баярлалаа.
Б.Долзодмаа