"Тод магнай" сэтгүүлийн шинэ дугаар гарлаа

Айргийн амт нь чимчигнэсэн

Алтан намрын энэ л өдрүүдэд сэтгүүлийнхээ шинэхэн дугаарыг уншигч танаа хаяглан сууна. Сар саатан эрхэм танаа хүрдэг “Тод магнай” сэтгүүлийн энэ удаагийн дугаарын зочин хойморт Монгол төрийн наадамд дөрвөн үеэрээ уясан морио айрагдуулсан удамт уяачдын нэг Манлай уяач Галын Баттөмөр саатан тухаллаа.

Бор адуут дээдсийнхээ буян заяаг дээдэлж явдаг түүнийг ММСУХ-г санаачлан үүсгэн байгуулагч гэдгээр нь морь сонирхогч эчнээ мэдэх биз ээ. Удам дамжсан уяачдын уухай, шинэхэн Манлайн хууч таны гарцаагүй унших ярилцлага гэдгийг хэлэх нь зүйтэй байх.

Морьтон монголчууд дэлхийн дээд амжилтанд нэг дор хоёр төрлөөр бичигдсэн түүхэн үйл явдлын нэг жилийн ойн арга хэмжээний үеэр Монголын уяачид өөрсдийн  тэмдэглэлт өдөртэй болж буйг албан ёсоор зарласан. Цаашид жил бүрийн наймдугаар сарын 9-нийг орон даяар уяачийн өдөр болгон тэмдэглэж хэвшихийн сацуу аливаа уралдаан наадмын өмнө уяачид тангараг өргөж байхаар болсон нь есдүгээр сарын морины онцлох үйл явдлуудын нэг байлаа. Энэ тухай дэлгэрэнгүй мэдээлэл сурвалжлагыг та энэ удаагийн дугаараас уншаарай.

Төрийн наадмын түрүү хүлэг тэнцсэн Сүхбаатар аймгийн Эрдэнэцагаан сумын 90 жилийн ой өнөө жил тохиож буй. Ойн арга хэмжээний сурвалжлага болон түрүүлж, айрагдсан морьдыг 76-89 нүүрнээс тольдоорой.

Түүнчлэн “Хотгойдын хурд-3” хангайн бүсийн наадамд түрүүлж, айрагдан уясан эзэн, унасан хүүхдээ баясгасан удамт хурдан хүлгүүдтэй 56-69 нүүрнээс танилцах боломжтой.

“Монгол бардамнал” булангийн энэ удаагийн дугаарт дөрвөн жил дараалан төрийнхөө их баяр наадамд түрүүлэн шинэ амжилтын эзэн болоод буй МУ-ын Гарамгай мэргэн Холхорын Оюунчимэг уригдан оролцсон. Энэ мэтчилэн дурдаад байвал Монголын үндэсний спортын салбарт болсон олон чухал үйл явдлыг тусгасан 57 дахь дугаараа уншигч танаа өргөн барьж байна.

Морьтон монгол түмний минь цог золбоо улам бүр “Тод”орч, бусдыг “Магнай”-лж байх болтугай.