Говь-Алтай аймгийн ИХ-ын төлөөлөгч Х.Хурцгэрэл: "Шинэ сум” төслийг сумандаа хэрэгжүүлэхээр хичээж байна

-Баян-Уул сумын түүхт 90 жилийн ойн баяр наадмын арга хэмжээг гардан зохион байгуулсан юм байна. Юун дээр нь илүүтэй анхаарч ажилласан бэ?
-Сумынхаа 90 жилийн ойд мөнгөн хандив өргөснөөс гадна бэлтгэл хангах ажлыг өөрийн биеэр очиж зохион байгууллаа. Бид 2014 оныг  бүтээн байгуулалтын жил болгон зарлаж, сумынхаа 90 жилийн ойд  17 бүтээлч ажлаар бэлэг барьсан. Энэхүү бүтээлч ажлуудыг миний бие Засаг даргаар ажиллаж байхдаа санаачлан дэвшүүлсэн юм. Тэр ч утгаараа өөрийнхөө санаачилсан хөтөлбөрүүдийг ажил хэрэг болгох тал дээр сум орон нутгийнхаа удирдлага ард иргэдтэйгээ хамтран ажиллалаа. Энэ жил Говь-Алтай аймгийн арав гаруй сумд үүсч байгуулагдсаны түүхт ойгоо тэмдэглэсэн. Түүнээс манай Баян-Уул сум хамгийн олон бүтээн байгуулалтын ажил хийгдсэнээрээ ялгарч байгаа.Өөрөөр хэлбэл зөвхөн баярлаж  наадахдаа бус сумандаа үлдэх тал дээр нь илүүтэй анхаарсан нь зөв алхам байсан гэж бодож байна.
-Хэдэн онд сумын Засаг даргаар ажиллаж байсан юм бэ?
-2013 оны 1-р сараас 2014 оны 3-р сарыг  хүртэлх хугацаанд сумын Засаг даргаар ажилласан.Тэрхүү жил гаруйн хугацаанд олон бүтээлч ажлуудыг хийхээр төлөвлөж, нэлээдгүй зүйлийг хийж хэрэгжүүлсэн байсан. Манай сумын  хувьд ард иргэд нь их ажилласаг сайхан сэтгэлтэй. Анх ажил авахад  хийхээсээ ярих нь илүүтэй байсан бол “хөдөлмөрлөж байж амжилтанд хүрнэ. Баян-Уулчууд ямагт тэргүүлэгч байх ёстой” гэсэн уриа дэвшүүлсэний үр дүнд хүмүүсийн маань идэвхи сэргэж, дор бүрнээ хичээж эхэлсэн.Сум угтсан олон бүтээлч ажил үүнийг илтгэх байх. Би одоо Баян-Уул сумыг төлөөлсөн аймгийн ИХ-ын төлөөлөгчөөр ажилладаг. Сум орон нутгийн удирдлагаар  тодорхой хугацаанд  ажилласаных  ард иргэдийнхээ дуу хоолой болж, хөгжил дэвшилд нь өөрийн хувь нэмрээ оруулахыг хичээж явна.
-Аймгийн ИХ-ын төлөөлөгчийн хувьд сум орон нутагтаа ямар ажлуудыг хийгээд байна?
-Ямар ч байсан хүүхдүүдийнхээ сурч боловсрох орчинг сайжруулах, хэлний мэдлэгийг дээшлүүлэх үүднээс англи хэлний мэргэжлийн гадаад багш авчирсан.  Мөн орон нутгийн хөгжлийн сангийн хөрөнгөнөөс арай илүүтэй хувиарлуулахад анхаарч ажиллаж байна. Харин цаашид Засгийн газраас хэрэгжүүлж байгаа “Шинэ сум” төслийг сумандаа хэрэгжүүлэхээр хичээж байна. Энэхүү зорилго маань биелэхгүй байсан ч 2016 он гэхэд сумаа төвлөрсөн халаалтын системд холбогдуулж, цэвэр бохир  устай иргэд нь орчин үеийн шаардлагад нийцсэн тав тухтай орчинд ажиллаж амьдрах нөхцлөөр хангах боломжийг бүрдүүлэхийн төлөө ажиллана.
-Ярилцсанд баярлалаа. Таны цаашдын ажилд амжилт хүсье.
-Баярлалаа. “Тод магнай” сэтгүүлээрээ дамжуулан Баян-Уул сумынхаа уяачдадаа болон нийт ард иргэдэд эрүүл энх, аз жаргал,сайн  сайхан  бүхнийг хүсэн ерөөж, ажил үйлст нь өндөр амжилт хүсэн ерөөе.
Б.Долзодмаа