“DFD”ХХК-ийн захирал Д.Алтанчимэг:Бүтээгдэхүүнийхээ чанарт нүүр бардам байдаг

“Монголд үйлдвэрлэв” булангийн энэ удаагийн зочноор “Гоёл-2014” наадмын топ дизайнер шагналын эзэн“Даймонд фейшн дизайн” компанийн захирал, хатагтай Д.Алтанчимэг оролцож байна. Хараа булааж, нүд хужирласан өвөрмөц чамин загваруудаараа эчнээ танил болсон энэ бүсгүй бизнесийнхээ түүхийг хэрхэн хүүрнэхийг хамтдаа сонирхъё. 
-“Даймонд фейшн дизайн” компанийн бүтээгдэхүүн чамин, бас эдэлгээтэй хэмээн үйлчлүүлэгчид тань үнэлдэг юм билээ. Шигтгээгээр бүтээгдэхүүн урлах хэний санаа байсан бэ?
-Нөхөр бид Солонгост ажиллаж байгаад ирсэн. Миний ажиллаж байсан үйлдвэр нь оёсон хувцсан дээрээ шигтгээ наадаг байсан. Үүнээс санаа авч энэ технологийг Монголдоо оруулж ирсэн.
-Хичнээн нэр төрлийн бүтээгдэхүүн үйлдвэрлэж байгаа вэ?
-Хамгийн анх зөвхөн подволкон дээр хээ угалз, соёмбо зэрэг тоотой хэдэн дүрс хийдэг байсан бол яваандаа бүтээгдэхүүний төрөл загварууд олширч, одоогийн байдлаар давхардсан тоогоор  3000-гаад  загвартай болоод байгаа. Үйлчлүүлэгчдийн хүрээ тэлэхийн хэрээр бүтээгдэхүүний загвар ч гэсэн шинэчлэгдэж байдаг юм. Манай бүтээгдэхүүнүүдийн ихэнх нь 85 хувийн хөвөн даавуун материалаар хийгддэг учраас зөвхөн залуучууд гэлтгүй хижээл насныхан ч гэсэн их өмсдөг болоод байгаа.
-Олны танил хүмүүс гангарах нь цөөнгүй юм билээ?
-Манайхаар үйлчлүүлдэг олны танил хүмүүс цөөнгүй бий.  Мөн хамгийн гол үйлчлүүлэгчид бол гадаадад ажиллаж, сурч, амьдарч байгаа монголчууд. Тэд маань үндэсний хэв шинжтэй орчин үеийн донж, хийцтэй загваруудыг илүүтэй сонирхдог.
-Монголын загварын ертөнцийн чиг хандлагыг тодорхойлогч “Гоёл” наадмын хэд хэдэн удаагийн шагналтай байхаа?
-Гурван удаагийн “Гоёл” наадамд оролцож 2011 онд тусгай шагнал хүртэн, 2014 онд топ дизайнераар шалгарсан. Миний хувьд загвар зохион бүтээхдээ эртний монгол загварыг орчин үетэй нь нийлүүлэхийг эрмэлздэг. Хэрвээ анзаарсан бол манай зарим бүтээгдэхүүн дээрх хээ угалзууд эртний хаад, ноёдын хувцсан дээр байдаг шүү дээ.
-“Даймонд фейшн” компанийн өөр нэгэн гол бүтээгдэхүүн бол бэлэг дурсгалын зүйлс шүү дээ? 
-Тиймээ. Үйлчлүүлэгчид маань хүссэн хэмжээ загвараараа дурсгалын жааз хийлгэх боломжтой. Бид өдөр ирэх тусам өсөн нэмэгдэж байгаа үйлчлүүлэгчдийнхээ эрэлтэнд тулгуурлан жаазны үйлдвэртэй болсон. Мөн саяхнаас сүүлийн үеийн чиг хандлагыг даган хуулган наалтын машиныг оруулж ирээд байгаа.
-Бизнесийн ашиг орлого нэмэгдэхийн хэрээр аж ахуйн нэгжийн нийгэмд хүлээх хариуцлага нэмэгдэж байх ёстой гэдэг. Энэ тал дээр хэр анхаардаг вэ?
-Манайх 16-17 ажилтантай. Олонх нь анх нээгдсэн цагаас ажиллаж байгаа хүмүүс. Бид зах зээлийн хуулиар ажилчдынхаа ур чадвараар нь цалинг нь нэмэгдүүлдэг. Мөн хөгжлийн бэрхшээлтэй иргэдээ дэмжих, тэднийг ажлын байраар хангах тал дээр анхаарч ажилладаг. Манай үйлдвэрт хөгжлийн  бэрхшээлтэй гурван ч хүн ажиллаж байсны нэг нь жирэмсний амралтаа аваад байгаа.
-Төрөөс жижиг, дунд үйлдвэрлэлийг дэмжих хөтөлбөрийг хэрэгжүүлж буй. Үүнд хамрагдаж чадаж байна уу. Өөрөөр хэлбэл, энэхүү төсөл, хөтөлбөр гол эздэдээ хүрдэг болов уу?
-Ний нуугүй хэлэхэд үгүй байх гэж бодож байна. Тэрхүү төсөл, хөтөлбөр хэрэгжиж байгаа сургаар хэд хэдэн удаа төсөл бичсэн. Харамсалтай нь аль нь ч бүтээгүй. Ер нь ихэнх аж ахуйн нэгжийн удирдлагууд миний адил бодолтой яваа байх. Тэрхүү хөнгөлөлттэй зээлд нь хамрагдаж чадахгүй учраас арга буюу банкны өндөр хүүтэй зээл  авч үйл ажиллагаагаа явуулдаг. Тиймээс цаашдаа иймэрхүү төсөл, хөтөлбөрөө хэрэгжүүлэхдээ илүү өргөн хүрээнд буюу гол эздэд нь хүргэх тал дээр анхаарах хэрэгтэй юм шиг санагддаг шүү.
-Утасны дуудлагаас Христэд итгэдэг гэдэг нь анзаарагдаж байна лээ?
-Тиймээ, Солонгост байхдаа Христэд итгэгчид болсон. Бидний бүхий л ажил амьдралын дээр Бурханы ивээл, ерөөл дүүрэн байдаг.
-Олны төлөө гэсэн сайхан сэтгэл өвөртөлж яваа та бүхэнд амжилт хүсье. Ингэхэд танай бүтээгдэхүүнүүдийг хаанаас авч болох билээ?
-Үйлдвэрийн дэргэдэх төв дэлгүүрээс болон гэрээт борлуулагчдаас авах боломжтой. Манай бүтээгдэхүүнүүд Их дэлгүүр болон хорооллын “Номин”, мөн саяхан шинээр нээгдсэн офицеруудын ордны  дэргэдэх “Тэнгэр плаза” худалдааны төв, мөн ТБД андуудын хажууд Старс төвийн 4-н давхарт тус тус худалдаалагдаж байгаа. Харин орон нутагт гэвэл Замын-Үүд, Хөвсгөлд гэрээт борлуулагчийн салбар бий. Бидний хамгийн гол давуу тал бол үйл ажиллагаа эхэлсэн цагаасаа эхлээд валютын ханш, инфляцийн өсөлтийг үл харгалзан үнээ барьж байгаа явдал юм. Манай бүтээгдэхүүнүүд анх ямар үнэтэй арилжаалагдаж байсан, яг тэр үнээрээ л өнгөрсөн найман жилийн турш үйлчлүүлэгчдийн хүртээл болж байгаа.
-Уламжлалт булангийн маань урилгыг хүлээн авч ярилцсанд баярлалаа. Ажилд нь амжилт хүсье.