Аймгийн Алдарт уяач Д.Баярсайхан:Зээрд соёолонгоороо төрийн зарлигтай наадмын анхны түрүү хүртлээ

Баянхонгор аймагт болсон Ламын Гэгээн Лувсанданзанжанцаны мэлмий гийсний 375 жилийн ой, говийн бүсийн хурдан морины уралдаанд зээрд соёолонгоо түрүүлгэсэн Баян-Овоо сумын уугуул, аймгийн Алдарт уяач Дамдинсүрэнгийн Баярсайхантай цөөн хором ярилцсанаа хүргэе.   
-Говийн бүсийн наадамд соёолон түрүүлгэсэн хийморилог эрхэмд баяр хүргэе?
-Баярлалаа. Зээрд соёолон маань Дорнод аймгийн Чойбалсан сумын харьяат Бэххуягийн унаган адуу. Би 2011 онд эмнэг даага авч байсан юм. Тэр жилээ уягдаж ганц нэг уралдаад шүдлэн,хязааландаа өнжсөн. Энэ жил соёолондоо аймгийн хаврын уралдаанд гурвалж , суманд болсон уралдаанд мөн гурваар давхиж айрагдсан. Тэгээд Заг сумын 90 жилийн ойд очиж түрүүлчихээд даншигтаа ирсэн юм. Энэ жилийн хувьд зээрд үрээ дөрөв уралдааж  хоёр түрүүлэн, хоёр айрагдлаа. 
- Хурдан гэсэн адуугаараа азарга тавих нь элбэг. Ялангуяа холоос ирсэн адуугаар?
-Үр төл талаас нь бодвол мэдээж тэр нь дээр л дээ. Гэхдээ тухайн адууны өөрийнх нь амжилтыг бодвол азарга байх нь дээр үү, морь болгох нь дээр үү гэдэг сонголт хийх болно. Зээрд үрээнийхээ зохицлыг харж байгаад хөнгөлсөн нь дээр гэж үзсэн юм.
-Говийн бүсийн уралдаанд хэдэн насны морьтой очсон бэ?
-Соёолон, даага хоёртой очсон. Соёолон нь түрүүлээд, даага нь 11-ээр давхисан. Уг  нь гайгүй их морьтой байсан ч хөлийг нь гэмтээчихээд мордуулаагүй.
-Зээрд соёолонгийн амжилт Засгийн газрын тогтоолт бүсийн наадмын анхны хишиг үү?
-Тиймээ. Зээрд соёолонгоороо төрийн зарлигтай наадмын анхны түрүүгээ хүртлээ.Түүнээс өмнө  2008 онд аймагт түрүүлсэн халтар азаргатайгаа очиж Ховд аймагт болсон баруун бүсийн наадамд зургаагаар давхиулж байлаа.Халтар азарга маань Сүхбаатар аймгийн Сүхбаатар сумын харьяат Чулуунбаатар гэдэг хүний унаган адуу байгаа  юм. Би 2005 онд аваад хойтон жил нь Баянхонгор аймгийнхаа  наадамд  анх түрүүлгэж байсан. Дараа  жил  нь буюу 2007 онд аймагтаа аман хүзүүдээд, 2008 онд дахин түрүүлж, давхар уяагаар баруун бүсийн наадамд очиж зургаалсан. Одоо 15,16 тай азарга бий.
-Баярсайхан Алдарт хэдий үеэс хурдан хүлгийн уяа сойлго тааруулах болсон юм бэ?
-2003 оноос эхэлж хурдан морь сонирхон уяж эхэлсэн дээ. Хамгийн анх нутгийнхаа нэг уяачаас  алаг морь худалдаж аваад  аймаг орон нутагтаа гайгүй сайхан давхиулсан. Түүний дараа 2005 онд миний том ах Дүгэрсүрэн Сүхбаатар аймгаас нэг шүдлэн үрээ авчирч өгсөн нь аймгийн наадамд аман хүзүүдсэн. Тэгж л ахынхаа өгсөн адуугаар анхны айргаа хүртэж байлаа. Тэр цагаас хойш халтар азаргаа хоёр түрүүлгэж, нэг айрагдуулаад, их насны морь таваар давхиулсан. Мөн миний маллагаатай морь аймгийн наадамд хоёр жил дараалан түрүүлсэн. Энэхүү амжилтаараа 2011 онд аймгийн Алдарт уяач цол хүртсэн дээ.
-Адуу тань аймагтаа ойрхон нутагладаг уу?Аймгийнхаа наадамд түлхүү наадсан байх юм?
-Баацагаан сумын харьяат, аймгийн Алдарт уяач Саранбаатар гэж манай найз бий. Тэр найз маань миний морьдын уяаг тааруулдаг. Найз маань адуу малтай их зөв харьцдаг. Жилийн дөрвөн улиралд адуун дээрээ байдаг хүн.
-Хурдан зээрдийн эзний цааш цаашдын  уралдаануудад нь амжилт хүсье. Ярилцсанд баярлалаа.
Б.Долзодмаа