Т.Бямбажаргал: Халтар үрээ төрийн наадмын анхны айргийг авчирсан

-АХ-ын 93 жилийн ойн баяр наадмын эрлийз дунд насны ангилалд хар үрээ айргийн гуравт хурдлуулсан танд баяр хүргэе?
-Баярлалаа. Халтар шүү. Андуураад биччихсэн байна лээ. Халтар үрээ маань МУ-ын Манлай уяач  Билэгдэмбэрэлийн унаган адуу.Би шүдлэнд нь битүү үрээ  авч, хязаалангаас нь уралдуулж байгаа юм.Энэ хавар  Орхон аймгийн “Эрдэнэт хүлэг” МСУХ-ноос зохион байгуулсан уралдаанд дөрвөөр  давхиж, наадмын өмнөхөн зургадугаар сарын 20 хэдэнд болсон Баян-Өндөр сумын 20 жилийн ойд түрүүлсэн. Тэгээд улсын наадамд гурваар давхиад энэ жилийн уралдаан отголсон доо.
-Бүсийн наадамд уралдаагүй хэрэг үү?
-Тиймээ, уг нь аль нэг бүс рүү явъя гэж байснаа бага адууг амраах нь зүйтэй гэсэн шийдэлд хүрээд больсон.Тэгээд ч энэ жил амжилттай сайхан наадлаа шүү дээ.
-Халтар үрээний эзэн хэзээнээс хурдан хүлгийн уяа тааруулж байгаа вэ?
-Хоёр, гурван жилийн өмнөөс л морь мал уяж байна даа.Түүнээс өмнө найз нөхдийнхөө адуу малан дээр очиж хийморио сэргээгээд явдаг байсан. Морь уяад удаагүй болохоор амжилт ч багатай.
-Морь уях, адуу малтай ойр байхын хамгийн сайхан нь юу вэ?
-Монгол хүн болгоны цусанд адуу байдаг гэдэг үнэн юм билээ.Манай аав Ховд аймгийн Мөст сумын хүн л дээ. Бага залуудаа морь уядаг тэдгээр нь сум орон нутагтаа гайгүй уралдчихдаг байсан гэдэг юм. Мөст сумынхаа баяр наадмаас нэлээд хэдэн айраг, түрүү авсан юм билээ. Тэгээд сургууль соёлын мөр хөөгөөд мориноос хөндийрсөн гэж ярьдаг.Намайг хурдан морь сонирхоход аавын маань энэ түүх мөн найзуудын маань нөлөө их байсан. Одоо бол морь миний хувьд цаг заваа харамгүй зориулж, сэтгэлийн ташаал авдаг болсон хобби маань юм даа. Монгол хүн морьтойгоо ойр байх сайхан шүү дээ.

"Тод магнай" сэтгүүл №58