Чансаа өндөр азарганууд

1. Монгол төрийн наадамд гурван үеэрээ азарга түрүүлгэсэн бахархалт түүхийн эзэн, Төв аймгийн Баянцагаан сумын уугуул,  аймгийн Алдарт уяач Даваахүүгийн Баянбатын Наран хонгор 10 оноогоор 2014 оны чансаа өндөр азаргануудыг тэргүүлжээ. Хөдөлмөрийн баатарын хурдан хүлгүүдийн нэг Хөх цавьдар азарганы төл Д.Баянбатын  Наран хонгор азарга өнөө жил төрийн их баяр наадам болон “Их мандал-2014” төвийн бүсийн уралдаанд тус тус түрүүлсэн билээ.
2. Жагсаалтын хоёрдугаарт хоймор нутгийн хийморилог хүүгийн халиун азарга долоон оноогоор бичигджээ. Хөвсгөл аймгийн Мөрөн сумын уугуул, “Дэлтэй цэнхэр” МСУХ-ны нарийн бичгийн дарга, аймгийн Алдарт уяач Түдэндоржийн Болдбаатарын  халиун азарга өнөө жил төрийнхөө их баяр цэнгэлд аман хүзүүдээд давхар уяагаар “Хотгойдын хурд” хангайн бүсийн наадамд айргийн гуравт хурдалсан юм.
3. Дундговь аймгийн Эрдэнэдалай сумын уугуул Содномцэрэнгийн Цэмбэлийн сартай хүрэн азарга долоон оноогоор гуравдугаар байрт бичигджээ. Дуу хуурын өлгий нутгийн хүүгийн хийморийг өргөсөн хүрэн азарга АХ-ын 93 жилийн ойн үндэсний их баяр наадамд айргийн дөрөв, “Дорнод талын хурд-2014” зүүн бүсийн уралдаанд айргийн тавд тус тус хурдалсан билээ.
4. Чансаа өндөр азарганы дөрөвдүгээр байрт Ховд аймгийн Эрдэнэбүрэн сумын уугуул Эрдэнэ-Очирын Тамирын хүрэн халзан дөрвөн оноогоор бичигджээ. Төрийнхөө их баяр цэнгэлд айргийн гуравт хурдалсан халзан азарга Сүхбаатар аймгийн Асгат сумын харьяат, сумын Алдарт уяач Ю.Наранбаатарын унаган адуу юм.
5. Шилдэг азарганд айрагдсан дараагийн хурдан хүлэг бол Улаанбаатар хот, Баянзүрх дүүргийн харъяат Бадамын Оргилын Оодон халтар азарга юм. Төрийнхөө наадамд айргийн тавд хурдалсан халтар азарга ийнхүү дөрвөн оноогоор 2014 оны чансаа өндөр хүлгүүдийн нэгээр тодорчээ.   
6. Жагсаалтын зургадугаарт Өвөрхангай аймгийн Өлзийт сумын уугуул, аймгийн Алдарт уяач Дуламын Сугарын хул азарга дөрвөн оноогоор бичигджээ. Сүүлийн жилүүдэд тогтмол амжилттай наадаж буй хул азарга өнөө жил төрийнхөө наадамд хараахан айрагдаж чадалгүй зургаад хурдалж давхар уяагаар “Дорнод талын хурд-2014” зүүн бүсийн уралдаанд магнайдаа тоосгүй түрүүлсэн юм.
7. Ламын Гэгээн Лувсанданзанжанцаны мэлмий гийсний 375 жилийн ой, говийн бүсийн уралдаанд түрүүлсэн Баянхонгор аймгийн Баян-Овоо сумын уугуул, аймгийн Алдарт уяач Бундын Бүрэнтөрийн хүрэн халзан азарга дөрвөн оноогоор жагсаалтын долоод бичигджээ. Хүрэн халзан азарга Төв аймгийн Баянцогт сумын харьяат Адъяагийн унаган адуу гэнэ лээ.
8. Морин жилийн өнгө тольдох хаврын бүсийн “Дүнжингаравын хурд” уралдаанд түрүүлсэн Өмнөговь аймгийн Ханхонгор сумын уугуул, аймгийн Алдарт уяач Навааны Энхболдын хүрэн азарга жагсаалтын наймдугаарт бичигдсэн байна.
9. Тусгаар тогтнолын төлөө тэмцэгч, төр нийгмийн нэрт зүтгэлтэн Галдан бошигт хааны мэндэлсний 370 жилийн ой, баруун бүсийн уралдаанд түрүүлсэн Ховд аймгийн Цэцэг сумын уугуул, МУ-ын Хөдөлмөрийн баатар, Ардын эмч Начингийн Баасанжавын  хул азарга мөн л дөрвөн оноогоор жагсаалтын есдүгээрт бичигджээ.
10. 2014 оны чансаа өндөр азаргануудын аравдугаарт “Өвөрхангай-2014” хаврын бүсийн уралдааны түрүү, Өвөрхангай аймгийн Баянгол сумын харьяат, аймгийн Алдарт уяач Төмөрпүрэвийн Ганзоригийн загал бичигджээ.
Б.Долзодмаа