Нийслэлийн МСУХ-г үүсгэн байгуулагчид “Эрдэнийн очир” одонгоор энгэрээ мялаалаа

Нийслэлийн МСУХ үүсэн байгуулагдсаны 10 жилийн ойг тохиолдуулан холбооны тулгын чулууг тавилцсан МУ-ын Алдарт уяач Б.Цэдэв, “Шинэ дэлхий холдинг" ХХК-ийн захирал, аймгийн Алдарт уяач  Л.Алтанхуяг, Б.Эрдэнэ-Очир, Л.Ганзориг, Б.Тэрбиш нарын таван хүнийг ММСУХ-ны дээд шагнал болох “Эрдэнийн Очир” одонгоор шагнасныг НМСУХ-ны тэргүүн М.Мөнхбаясгалан болон тэргүүлэгчид, Улаанбаатар хотын удирдлагууд албан ёсоор гардуулж хүндэтгэл үзүүлжээ.
Нийслэлийн МСУХ 2014 оны нэгдүгээр сарын 25-нд удирдлага зохион байгуулалтын шинэчлэлт хийн үйл ажиллагаагаа өргөжүүлж “Хангарьд-2014” уралдааныг анх зохион байгуулсан бөгөөд зохион байгуулагчаар Л.Очирсүрэн,  монгол түмэндээ Хилэн хар азаргаараа танигдсан, аймгийн Алдарт уяач  А.Отгонбаяр нар ажилласан юм. Тэдний хичээл зүтгэлийг ММСУХ-ноос өндрөөр үнэлэн "Эрдэнийн-Очир" одонгоор шагнасныг мөн энэ үеэр гардуулсан юм.
Түүнчлэн төр засагтаа ажил хөдөлмөрөө үнэлүүлж Сүхбаатарын одонгоор энгэрээ мялаасан Хяналтын зөвлөлийн дарга, Гавьяат эдийн засагч Б.Осоргарав болон “Алтан гадас” одонгоор энгэрээ мялаасан дэд тэргүүн Л.Наранбаатарт баяр хүргэж, сайн сайхныг хүслээ.
2014 онд нийслэлийн МСУХ-ны хамт олон уралдаанч хүүхдийн амь нас, аюулгүй байдлын хангах зорилгоор тэдний бодит амьдралыг харуулсан таван  цуврал баримтат кино “Яндаг фильм” студитэй хамтран бүтээхийн сацуу Өлзийт хороолол дахь далангийн замыг засаж янзалсан байна. Энэ ажилд туслалцаа дэмжлэг үзүүлсэн “Түмний эх”, “Талын хүлэгч”, “Ажнай”, “Макс”, “Босоо хүлэг”, “Их салхин”, “Боржигоны хурд” зэрэг гал уяаны хамт олонд болон МУ-ын Манлай уяач Д.Хишигжаргал нарт талархсанаа илэрхийлнэ билээ. Дашрамд сонирхуулахад   Өлзийт хорооллын замыг цаашид арчлалт хамгаалалтандаа авч, засварын ажлыг нийслэлийн 14 дүгээр хороо буюу Өлзийт хорооллын удирдлагууд, ард иргэдтэй хамтарч 2015 ондоо үргэлжлүүлэн хийх аж.
Мөн уламжлал ёсоороо “Хангарьд” уралдаанаа зохион байгуулах бөгөөд товыг тэргүүлэгчдийнхээ хурлаар тогтож, албан ёсоор ММСУХ-нд батлуулахаар өгчээ.

У.Энхмаа