Уяач Д.Лодой: Хонгор халзан соёолон маань алдарт Нийгмийн хонгорын угшилтай адуу

-Уугуул нутаг тань түүхт 90 жилийн ойгоо өргөн дэлгэр тэмдэглэн өнгөрүүлж  байна. Баярын сэтгэгдлээсээ хуваалцахгүй юу?
-Баярлалаа. Төрөлх сумынхаа 90 жилийн ойд урилгаар оролцож байгаадаа сэтгэл хангалуун байна. Би энэ нутгийн унаган хүн. Долоонхудагийн хөндий Цайдам нуурын хажууд тоглож өссөн. Сумын маань 90 жилийн ойн баяр наадамд нутгийн уугуул иргэдээс гадна энд ажиллдаж амьдарч байсан олон хүмүүс оролцож, газар газрын хурд цугларсан өргөн дэлгэр сайхан болж байна.
-Сумынхаа түүхт ойн наадамд соёолон айрагдсан нь баяр дээр баяр нэмсэн сайхан хэрэг боллоо? 
-Тэглээ. Сүүлийн жилүүдэд сумынхаа баяр наадамд ирж уралдаж байна. Миний загал морь 2011 онд зургаад, 2012 онд аман хүзүүдэж байсан. Энэ жилийн хувьд хийморьтой сайхан наадаж соёолонгоо гуравт, азаргаа долоод, их насны морио  45-т давхиулж, нутгийн минь уул ус буян хишгээ хайрлалаа. 
-Хөлснөөс нь адис хүртэхэд бүтэн жилийн хийморь сэргэдэг хэмээдэг хурдан соёолонгийнхоо удам угшлыг танилцуулаач? 
-Хонгор халзан соёолонгийн эцэг нь Сүхбаатар аймгийн Сүхбаатар сумын алдарт хүлэг Нийгмийн хонгорын  угшилтай хул азарга бий. Би 2000 онд соёолон үрээ байхад нь авчирсан юм. Дараа жил нь хавчиг азарга Төв аймгийн наадамд түрүүлсэн.
-Хонгор халзангийнхаа амжил­тыг түүхээс танилцуулаач?
-Шүдлэнгээсээ хойш сумын наадамд тогтмол айрагдаж байгаа юм.
-Угтаалцайдам сумын үе үеийн уяачид улсын наадамд одтой сайхан наадсаар ирсэн. Таны хувьд хэзээнээс хурдан хүлгийн уяа тааруулах болсон бэ?
-Миний авга ах нар сумандаа их хурдтай хүмүүс байсан юм. Манай сумынхан андахгүй  дээ. Дэндэвийн Дуламсүрэн/Дулий/,  Зулахын Санжаа гээд сайн уяачид байсан. Би хүүхэд байхдаа Дулийгийнхаа хурдан морийг унаж, өөрийн болон зэргэлдээ сумдын наадмаас олон түрүү айраг авч байсан даа. Дулий маань үнэхээр сайн адууны угшил бий болгосон хүн.  Энэ адууны угшил надад байдаг юм. Харин миний хувьд уяачийн гараагаа 1998 онд Төв аймгийн наадамд шүдлэн бор үрээгээ уяад 20-иор  давхиулснаар эхэлсэн гэж хэлж болно. Түүнээс хойш Тод манлай уяач Б.Жанчив, Алдарт уяач Ц.Цэрэнбал, Даш-Өлзий, алаг азарганы эзэн аймгийн Алдарт уяач Дарамренчин нартай хамт морь уяж, тэд нараас уяаны талаар их зүйл сурч мэдсэн нь одоо хэрэг болж байна.
-Таныг төрсөн нутаг усныхаа хөгжлийн төлөө чамгүй зүйл хийсэн гэдэг юм билээ?
-Би төрийн захиргааны төв байгууллагад насаараа ажилласан хүн. Сум орон нутгийнхаа хөгжилд тус дэм болох юмсан гэсэн сэтгэлтэй явдаг. Сумынхаа эрүүл мэндийн салбарт  анхаарал хандуулж, 120 сая төгрөгийн өртөг бүхий 10 ортой эмнэлгийн барилгыг барих болон түргэн тусламжийн машинтай болоход хоёр ч удаа дэмжлэг үзүүлж байсныг тухайн үеийн удирдлагууд болон нутгийн зон олон талархан хүлээн авсанд баярлаж байдаг.
-Хурдан тууртын босоо цагаан хийморьт өнө мөнх ивээгдэж явах болтугай. Амжилт хүсье.
"Тод магнай" сэтгүүл №59