Хөвсгөл аймгийн шигшмэл хурдан хүлгүүд уралдлаа

УИХ-ын гишүүн Л.Энх-Амгалангийн санаачилгаар хоймор нутгийн уяачид наадлаа. Ингэхдээ хурдан хүлгүүд нь сумандаа эхний 10-т орсон уяачдад урилга илгээсэн байна. Хурдан хүлгүүдээ нэг дор уралдуулсан нь Хөвсгөл аймгийн хурдыг сэргээх, уяачдаа олонд таниулан урамшуулах зорилго өвөрлөжээ. Аймгийн шигшмэл хурдан хүлгүүдээс гадна улсын начин А.Батмөнх, аймгийн арслан Б.Хөхчирэнгэр, Б.Баттүвшин, Г.Ганхуяг нарын тэргүүтэй 64 бөх энэхүү наадамд урилгаар оролцож, үнэн хүчийг үзсэн байна. Аймгийн цолтнуудаас гадна сумынхаа наадмын их шөвөгт шалгарч бөхчүүд уг барилдаанд зодоглосноос улсын начин А.Батмөнх түрүүлжээ.
“Хөвсгөлийн хурд 2015” наадмын талаар зохион байгуулагчид “Наадам сайхан болж өндөрлөлөө. Шороо тоосгүй, хүүхэд унаж бэртсэн зүйлгүй, ямар нэгэн будилаангүй наадам болсон” хэмээн онцлов. Нутгийн хурдан хүлгүүдээ үзэж сонирхохоор Мөрөн хотын хойд дэнж дээр 1000 гаруй хүн цуглажээ. УИХ-ын гишүүн Л.Энх-Амгалангийн санаачилгаар анх удаа болсон хоймор нутгийн шигшмэл хүлгийн наадмыг цаашид жил бүр уламжлал болгон зохион байгуулах аж. Тэгвэл уралдааны талаар уяачид нь тун сэтгэл хангалуун байгаа гэнэ. Учир нь, уг наадам цаг агаарын хувьд тун таатай нөхцөлд болсон, дээр нь бай шагнал өндөр байсныг онцолж хэллээ.
“Хөвсгөл хурд-2015” наадмын хурдан азарганы уралдаанд 75 хурдан ажнай шандас сорьсноос залуу уяач Б.Галсангийн Цолмон хээр торгон жолоо өргүүлсэн бол аман хүзүүнд Монгол Улсын манлай уяач Н.Намсрайдоржийн цоохор хурдалсан байна.
Харин соёолонд 80 гаруй хүлэг шандас сорьсон. Тоосонд нь дарагдвал хийморь сэргэдэг гэж ярьдаг соёолон насны морьдын уралдааны түрүү магнайд Хөвсгөл аймгийн Шинэ-Идэр сумын харьяат Ц.Чимэдийн хүрэн үрээ хурдалсан бол мөн дээрх сумын уяач Баттогтохын бор аман хүзүүдлээ.
Тэгвэл 100 гаруй хурдан даага гарааны зурхайгаас эргэхэд Тариалан сумын дөрвөн даага айргийн тавд багтсан содон үйл явдал болсон байна. Тодруулбал, Нямсүрэнгийн Мөнгөн хөлт халзан даага түрүүлж торгон жолоо өргөлөө. Харин аман хүзүүнд мөн л Тариалан сумын харьяат Батцогтын хүрэн хурдалсан байна. Гуравт Сүххуягийн Цоров халзан, дөрөвт Галт сумын Нямренчингийн  Шувуун саарал, айргийн тавд Тариалангийн Гантөмөрийн хонгор даага хурдаллаа.
Хурдан хязаалангийн уралдаанд мөн л 100 гаруй хүлэг бүртгүүлсэн. Улсын наадамд хязаалан түрүүлүүлж байсан Монгол Улсын алдарт уяач Доржпүрэв энэ жилийн төрийн наадамд зургаад хурдалсан халиун үрээгээ сойсон байна. Халиун хязаалан аргагүй хурдтай байж гарсан цагаасаа эхлэн өнгөлсөн. Гэвч барианы үзүүр дээр хадуурч тав руу ухарлаа. Ингэснээр түрүү магнайд Их-Уул сумын уугуул Ганжигүүрийн хүрэн өнгөлөв. Харин Тариалан сумын Цэдэндоржийн хар халтар аман хүзүүджээ. Их насны морьдын уралдаанд 97 хүлэг бүртгүүлэн гараанаас гарахад түрүү магнайд Галт сумын харьяат Нацагдоржийн ягаан халзан өнгөллөө. Харин Төмөрбулаг сумын уяач Баясгалангийн хар морь аман хүзүүнд давхив. Шүдлэнд 100 гаруй хурдан хүлэг гарааны зурхайгаас эргэсэн. Түрүү магнайд Хөвсгөл аймгийн Тариалан сумын харьяат Ганбаатарын хонгор орсон бол Галт сумын Цэрэнбатын будан бор аман хүзүүнд хурдаллаа. Сонирхуулахад, “Хөвсгөл хурд- 2015” шигшмэл хурдан морины уралдаанд 400 гаруй уяачийн 600 орчим хурдан хүлэг уралдлаа.

эх сурвалж: www.khuvsgulnews.mn