Сэтгүүлийн шинэ дугаар худалдаанд гарлаа

Хурдан хүлгийн хийморийн адис шингэсэн шинэхэн дугаараа уншигч танаа өргөн барьж байна.
Шинэхэн дугаараас сорчлон дуулгадаг “редакцийн зурвас”-таа энэ удаа монгол уяачийн ур  чадвар дэлхийн хэмжээнд үнэлэгдсэн баярт мэдээг онцлон хүргэж байна.
Өөрөөр хэлбэл монгол уяачийн шинжиж авсан, монгол уяачийн уясан хүлэг Дэлхийн Аваргын тэмцээнд түрүүлж, моринд хайртай монгол түмний магнайг тэнийлгэлээ. Энэ баярт үйл явдал өнгөрсөн сарын сүүлийн өдөр АНУ-ын Кентукки мужийн Лексингтон хотноо  болсон бөгөөд шинэ сарын эхний өдрийг монгол түмэн хөл хөөрцөг болон угтсан юм.
Молор эрдэнээ дээдлэгч монгол түмнийхээ магнайг тэнийлгэсэн тэр хийморилог эрхэм бол Говь-Алтай аймгийн Баян-Уул сумын уугуул, “Макс” группийн Ерөнхийлөгч, Тод манлай уяач Дагвадоржийн Ганбаатар юм.
Түүний Mongolian Saturdaу  дуудлагат  хээр морь АНУ-ын Кентукки мужийн Лексингтон хотноо  10-р сарын 31-нд болсон Breeders cup дэлхийн аварга шалгаруулах тэмцээний зүлэгний спринт төрөлд  түрүүлж, сая долларын шагнал хүртсэн юм. Mongolian Saturdaу –гийн уяа сойлгыг Завхан аймгийн Тэлмэн сумын уугуул, МУ-ын Алдарт уяач  Энэбишийн Ганбат, арчилгаа маллагааг Завхан аймгийн Нөмрөг сумын харьяат Пүрэврагчаагийн Даваадорж нар хариуцдаг бөгөөд эцэг нь Any  Given , харин эх нь  Miss Hot Salsa  дуудлагатай гэнэ лээ.
Энэ тухай дэлгэрэнгүй мэдээллийг та бүхэн “Урт чихт” булангаас хүлээн авч уншаарай.
Сэтгүүлийн зочин хойморт хэвлэл мэдээлэлд төдийлөн ам нээгээд байдаггүй “нууц ноёнтон” уригдан оролцсон. Энэ хүн бол Төв аймгийн Сэргэлэн сумын уугуул олноо “Дааган” хэмээн алдаршсан Рэнцэнгийн Ганхуяг юм. Монгол төрийн наадмаас есөн түрүү, 15 айраг хүртсэн тэрээр 2000 онд Монгол Улсын Манлай уяач хэмээх эрхэм цолны эзэн болсон билээ. Барагтай бол ам нээгээд байдаггүй Манлайн ярилцлага уншигч таны сонирхлыг татах бизээ.
“Уралдаан” буланд АХ-ын 94 жилийн ой үндэсний их баяр наадмын эрлийз ангилалд түрүүлж айрагдсан болон эхний аравт хурдалсан хүлгүүдийг танилцуулж, уяач эздийнх нь баярыг сэтгэгдлийг нийтэлсэн байгаа. Шинэ цагийн монгол адууны шандсыг шалгадаг уг төрөлд хэний ямар хурдан хүлгүүд цахиур хагалан хурдалсаныг мэдэхийг хүсвэл сэтгүүлээ дуустал нь уншаарай.
Монгол хүний ур ухаан, авьяас билгийн гайхамшгийг мэдрүүлдэг “Монгол бардамнал”, үндэсний үйлдвэрлэлээ дэмжих зорилготой “Монголд үйлдвэрлэв” булангийн зочид та бүхний хүсэн хүлээсэн хүмүүсийн нэг байж мэднэ.
Сар саатан эрхэм танаа хүрдэг сэтгүүлийн хуудас бүр уншууртай мэдээ мэдээллийг агуулсан  гэдгийг сануулж энэ удаагийн зурвасаа өндөрлөе.
Сэтгүүлийн шинэ дугаарыг хэвлэлийн бирж, "Интерном" дэлгүүр болон  редакцийн  95092992, 94012992 дугаарын утсанд холбогдож авна уу.