МУ-ын Манлай уяач Н.Хүрлээ: Одоогоор нэг гүүний гурван төлөөр "Говьшанхын хурд" уралдаандаа одтой сайхан наадаад байна

А.Тэлмэн
2016 оны 2-р сарын 03 -нд

"Говьшанхын хурд-5" наадмаас...
-“Говьшанхын хурд-5” уралдаандаа одтой сайхан наадаж айраг, түрүү хүртсэн танд баяр хүргэе?
-Баярлалаа. Энэ сайхан баярт мөчийг “Тод магнай” сэтгүүлийн хамт олонтой хуваалцаж байгаад баяртай байна. Таван удаа болж байгаа Говьшанхын хурд уралдааны гуравт нь оролцож байна. Хамгийн анх “Говьшанхын хурд-3”-т оролцож байсан бол дөрөвт нь саарал морио түрүүлгэж байлаа. Энэ жил саарал мориороо уралдчих санаатай байсан ч чадсангүй. Тэгээд дүү хавчиг бор морио тавьсан нь 20 гаргаад ирлээ.
-Харин энэ удаа эрлийз дунд насны ангилалд  хээр үрээгээ түрүүлгэсэн?
-Тэгсэн. “Говьшанхын хурд 5” говийн бүсийн уралдаанд түрүүлсэн хээр үрээ миний унаган адуу байгаа юм. Даагандаа улсад түрүүлж, “Ирээдүйн түмэн эх”, төвийн бүсэд түрүүлсэн. Өнөө жил Говьшанхад түрүүллээ. Уяач хүний баяр жаргалыг мэдрүүлдэг буянтай хүлэг. Харин айрагдсан хонгор халзан даага хээр үрээний мааньтөрсөн дүү байгаа юм. Сөнгө даага сайхан өнгөлж яваад гуравлалаа.
-Хурдан хүлгүүдийн эцэг эх нь ямар адуунууд байдаг вэ?
-Миний Эрин гэж англи азарга байсан, түүний төл. Харин өнөөх нь Балатин гэж азарганы төл. Одоогоор шинэ монгол адууны үржил хийж, гарсан төлүүд нь иймэрхүү болчихоод байгаа юм.
-2007 оны Говьшанхад хэдэн насны морь мордуулсан байсан билээ?
-Тэр жил өвөөгийнхөө азаргыг тавьж, зургаагаар оруулж, их морь түрүүлгэж, Бат-Эрдэнэ ахын хонгор шүдлэнг айрагдуулан наадсан.
Анх Бат-Эрдэнэ Тод манлайн санаачлагаар зохион байгуулагдаж байсан энэ уралдааны цар хүрээ жил ирэх тусам өргөжиж говийн уяачдын хүсэн хүлээдэг наадам болжээ. Хүлэг мориороо хийморио сэргээдэг аавын хөвгүүдийн гарцаагүй уралдаж үзэх уралдааны нэг болсон байна.
-Шинэхэн Манлай энэ жил хаагуур наадавдаа?
-Улсад их морь хорь гаргаж давхиуллаа. Ингээд Говьшанхдаа зорин ирж унаган адуугаараа наадан нэг түрүү, нэг айраг авч цолоо мялаалаа. Цол авах яахав. Түүнийгаа хамгаална гэдэг хамгийн чухал нь. Тийм болохоор адуугаа сайжруулах зорилго дэвшүүлчихээд явж байна.
Одоогоор нэг гүүний гурван төлөөр Говьшанхын хурд уралдаандаа  одтой сайхан наадаад байна. Тавд нь ах, дүү хоёр орсон бол “Говьшанх IV”-т ах шүдлэн үрээ нь даагандаа түрүүлчихээд байгаа юм.
-Өнөөдөр аль ч наадам дээр ялгалтаас болоод асуудал гарсаар л байна. Энэ тал дээр та ямар бодолтой явдаг вэ?
-Холиод уралдахаар хэцүү, бас холихгүй гэхээр хэцүү. Минийхээр цэвэр хурдны адуу үржүүлбэл үр шимийг нь үзэж болохоор юм шиг. Жишээлбэл: би хээр үрээгээ Кавказаас авчирч байсан. Тэр үед Ганбат Алдарт, Бандгаа Тод манлай ч бас авч байлаа. Ялгалтын тухайд тэртээ тэргүй бай шагнал нь адилхан байхад эрлийзийг нь эрлийзэд нь, монголыг нь монголд нь уралдуулж баймаар санагддаг.Гэхдээ уяачид маань ярьж байгаад  удахгүй нэг шийдэлд хүрэх байлгүй дээ. Тэрнээс би энд тэгэх ёстой, ингэх ёстой гэж яриад яахав.
-Бидний урилгыг хүлээн авч ярилцсанд баярлалаа.
"Говьшанхын хурд" сэтгүүл №01

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна