Шилдэг унаач Д.Батбаатар: Шагналынхаа мөнгөөр бэлэг авч өгөхөд, ээж минь их баярласан

Увс аймгийн Цагаанхайрхан сумын Шилдэг уралдаанч Д.Батбаатар хүүгийн яриаг уншигч танаа хүргэж байна.
- Миний дүү хэзээнээс морь унах болов, хэн гэж хүний ямар морийг унадаг бэ?
-Зургаан настай сумын Алдарт уяач Нямсүрэн ахын хул мориор унаачийн гараагаа эхэлсэн.Анх унасан жилээ сумын баяр наадамд айргийн гуравт, овооны наадамд дөрөвт оруулсан. Хул морийг би зургаан наснаасаа наймдугаар анги хүртлээ найман жил унаж байна. Өнгөрсөн жил сумын баяр наадамд түрүүлсэн. Хул морио гурав айрагдуулж, нэг удаа түрүү магнайд хурдлуулсан.
- Хул морины дараа ямар морь унасан бэ?
- Сумын баяр наадмаар Шинэбаяр гэдэг хүний хүрэн шүдлэнг гуравт оруулж медаль авсан. Хүрэн үрээг унаад хоёр жил болж байна. Өнгөрсөн жил аав Дүгэрсүрэнгийнхээ уясан хүрэн даагыг  унаж сумынхаа баяр наадамд түрүү магнайд хурдлуулсан. Өнгөрсөн жилийн овооны баярт аймаг, сумын олон морьд ирсэн том наадам болсон. Энэ наадамд хүрэн даага бид хоёр түрүүлж сумынхаа нэрийг гаргасан.
- Батбаатар 2014 онд гаргасан амжилтаараа сумынхаа шилдэг унаачаар тодорсон. Энэ онд ямар ямар амжилт гаргасан бэ?
- Нямсүрэн ахын хул морийг сумын наадамд түрүү, овооны наадамд аман хүзүү, сумын баяраар айргийн гуравт. Шинээ ахын хүрэн үрээг овооны баяраар 15-аар давхиулан, сумын наадамд айргийн дөрөвт, дээрээс нь манай хүрэн дааганы амжилтаар шилдэг унаач болсон. 
- Шилдэг унаач болоход ямар байсан бэ?
- Өөрийгөө маш их үнэлж сэтгэл маш их догдолсон. “Шилдэг унаач” өргөмжлөл 21000 төгрөгтэй шагнасан. Тэр өдөр манай ээжийн төрсөн өдөр байсан болохоор ээждээ шагналынхаа мөнгөөр бэлэг авч өгөхөд, их баярласан.
- Аав нь сүүлд морь уяж эхэлсэн юм уу?
- Аав ноднингоос л морь уясан. Ноднин хүрэн даагатай хамт хээр унага уяхаар бэлдэж байсан. Одоо зургаан сард болох Баруунтурууны наадамд хээр даагаа унана.
- Моринд томдох тийшээ орж байна. Дүүтэй юу, дүү нар нь морь унадаг уу?
- Энэ жилдээ гайгүй уначих байхаа. Биеэр уг нь жижиг л дээ. Би хоёр дүүтэй. Миний доод талын дүү 10 настай үсэргээ сунгаанд уначихдаг, яг уралдаанд бол сайн унаж чаддаггүй. Би дүүтэйгээ туршлагаасаа хуваалцдаг. Мориндоо мордож байгаад ингэж унаарай, тэгээрэй гэж хэлж өгдөг. Миний үгэнд ч сайн ордог юм. 
- Миний дүү морь сайн унахаас гадна ямар авьяастай вэ?
- Би бүжиглэх дуртай. Цэнгээнт бүжгийн дугуйланд явж байхдаа хурдан морь гэж явсаар гарсан. Мориноос хасагдахаараа бүжгээрээ сайн хичээллэнэ. Хичээлээс гэвэл зураг, технологийн хичээлд илүү дуртай. Дараа нь эрүүл мэнд, газар зүй гэсэн хичээлүүдэд гайгүй. Газарзүйн хичээлд сайн болохоор цаашдаа энэ талын мэргэжилтэй болно гэж боддог. Энэ жилээс барилдан Улаангомд болсон жудогийн улсын аваргаас хүрэл медаль авсан. 
- Морь унахын юу нь сайхан байдаг вэ, морь унахаар юу бодогддог бэ?
- Хурдан морины давхил, харайж байгаа нь надад онцлог санагддаг. Наадамчин олны сэтгэлийг дотроос нь баярлуулдаг учраас би морь унах дуртай. Мориндоо ямар нэг юм болбол янзлах гээд уяачдаасаа асууж зөвлөгөө авдаг. 
- Даага сургаж чадах уу?
- Өөрийнхөө хүрэн, хээр хоёрыг сургасан. Хүний морь сургаад байдаггүй. 
- Амжилт гаргахаар морины эздүүд шагнадаг даа. Батбаатарт өөрийн нэртэй мал байна уу?
- Нямсүрэн ах жил болгон хургатай хонь өгдөг. Нийт найман хоньтой болсон. Шинээ ах унааны даага өгсөн нь одоо хязаалан болсон байна. 
- Ярилцсанд баярлалаа. Дүүдээ амжилт хүсье. 
"Тод магнай" сэтгүүл Увс аймгийн тусгай дугаар