Алдартай азарганы зураг 36 сая доллараар зарагдсан

А.Тэлмэн
2017 оны 9-р сарын 27 -нд

Уран зураг, урлагийн бүтээлүүд янз бүрийн дуудлага худалдаагаар асар өндөр үнэ хүрч зарагддаг. Ингэж их үнэ хүрч зарагдсан бүтээлүүдийн дотор хүн төрөлхтний орон зайд үл баригдан, салхи мэт эрх дураараа, чөлөөтэй байх хүслийн илрэл болсон итгэлт нөхөр болсон хурдан хүлгийг дүрсэлсэн, хурдан морьтой холбоотой уран бүтээлүүд ч цөөнгүй.
Жишээлбэл, Английн зураач  Жорж Стаббсын 1765 онд туурвисан “Жимкрек азарга Ньюмаркет –Хийзд дасгалжуулагч, малчны туслах ба жокейн хамт байгаа нь” нэртэй бүтээл “Кристис”-ийн дуудлага худалдаагаар 36 сая доллараар зарагдаж байв. Энэ зураг дээр 18 дугаар зууны үеийн Британийн хамгийн алдартай хурдан хүлгүүдийн нэг Жимкерк нэртэй азаргыг дүрсэлсэн байдаг. Энэ азарга нь нийт 36 удаагийн уралдаанд оролцохдоо 28 нь түрүүг нь авч тухайн үеийнхээ домог болсон ажнай юм.
Адуу дүрслэгдсэн өндөр үнэтэй өөр нэг зураг нь суут Леонардо Да Винчийн “Хүлэгтэн ба хүлэг” нэртэй хар зураг юм. Суутны бүтээл дуудлага худалдаагаар 11 сая 400 мянган доллараар зарагдсан.
Америкийн 19 дүгээр зууны алдарт зураач Эдвард Хоперийн “Морин жим” нэртэй уран зураг “Сотбис” худалдаагаар орж 10 сая 386 мянган доллараар зарагдсан. Энэхүү бүтээл дээр Нью-Йоркийн Төв цэцэрлэгт хүрээлэнгээр зугаалж яваа гурван морьтныг харуулсан байдаг.
Бүтээлүүд нь хамгийн  их үнэ хүрдэг зураачдын нэг болох 20 дугаар зууны суут зураачдын нэг Марк Шагалын “Морь унасан бүсгүй” нэртэй бүтээлийг “Кристис” дуудлага худалдаагаар 8 сая 977 мянга 800 доллараар зарагдаж байв.
Харин 20 дугаар зууны хамгийн алдартай морь зурагч гэгддэг Альфред Маннингсын “Гал шар гүнж нэртэй гүү” нэртэй зураг Кристис дуудлага худалдаагаар 7 сая 848 мянган ам.доллараар зарагдсан. Маннингс нь гол төлөв уралдаж эсвэл авд оролцож байгаа морьд зурдаг байсан тул “хамгийн алдартай морь зурагч” гэдгээрээ алдаршсан нэгэн юм. Хурдан морины уралдааныг харуулсан түүний бүтэээлүүдийг АНУ-аас эхлээд Их Британи, Европын хамгийн баян цуглуулагчид худалдан авсан байдаг.
Америкийн “зэрлэг баруун”-ы амьдралыг магтан дуулагчдын нэг зураач, чимэглэгч Фредерик Ремингтон “Collier’s Weekly” сэтгүүлийн чимэглэлд зориулан зурсан “Цөлд амсхийх зуур” нэртэй бүтээл нь дуудлага худалдаагаар 2 сая 770 мянган доллараар зарагдсан байдаг. Ремингтон багаасаа хурдан морь сонирхдог, ан  ав хийх дуртай хүн байсан тул бүтээлүүд гайхамшигтай бодит харагддаг онцлогтой байсан тул бие даасан уран бүтээл бус сэтгүүлийн нэг нүүрийг гоё зорилгоор бүтээсэн энэхүү бүтээл ийм өндөр үнэ хүрчээ.
Макс Либерманы “Наран шарлагын газар дахь хоёр морьтон” нэртэй бүтээл 2 сая 500 мянган доллараар зарагдаж байв.
Хятадын модернист зураач Сүй Бэйхуны бүтээлүүд дэлхий даяар алдартай. Хүлэг морьд дүрсэлсэн түүний зургийг уран зураг сонирхогч, цуглуулагчид гар таталгүй өндөр үнээр худалдан авдаг. Жишээлбэл, түүний зурсан “Азаргыг бахдахуй” нэртэй бүтээл нь дуудлага худалдаагаар 2 сая 100 мянган доллар зарагдаж байв.
“Энэтхэгийн Пикассо” гэж нэрлэгдсэн Макбул Ф.Хусүйны “Үргэсэн морьд” бүтээл нь 1 сая 140 мянгаар зарагдсан юм.
Зөвхөн уран зураг гэлтгүй хүлэг морьдыг дүрсэлсэн уран баримал ч өндөр үнэ хүрдэг. Жишээлэхэд Польшийн уран барималч Эль Надельманы адууны хүрэл баримал 842 мянган доллараар зарагдсан нь үүний нэг жишээ.
Алдарт Пикассогийн “Хүлэгтэн ба хүлэг” нэртэй керамик баримал 9 мянга 702 доллараар зарагдаж байв. Ер нь Пикассогийн бүтээл болгоныг дуудлага худалдаагаар асар их үнэ хүрч зарагддаг.
Дашрамд сонирхуулахад дэлхийн түүхэн дэх хамгийн өндөр үнэ хүрч зарагдсан уран зураг Пабло Пикассогийн “Алжир эмэгтэй. 0 хувилбар.” нэртэй зураг юм. 2015 онд “Кристи” дуудлага худалдаагаар 179 сая 360 мянган ам.доллараар зарагдан дээд амжилт тогтоож байсан юм.

Б.Бадрал

.

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна