Тод манлай уяач Д.Ганбаатар: Бай шагналаа орон нутагт нь үлдээх, олон түмэнд хүртээх жишиг тогтоохыг зорьж байна

- Ардын хувьсгалын 96 жилийн баяр наадамд аман хүзүүдсэн зээрд соёолон тань Хангайн бүсийн уралдаанд түрүү магнайд хурдаллаа. Хөлсийг нь хүртэхэд буян хишиг нь ивээж, тоосонд нь даруулахад хийморь сэргэдэг соёолонгоор одтой сайхан наадаж байгаа танд баяр хүргэе?
-Баярлалаа. Манай Асгат саарлын төл хурдтай сайхан байна. Асгат саарал маань ч үнэхээр төл сайтай азарга юм. Үр төлүүд нь айраг, түрүүгээ бидэндээ хайрласаар л байна. Архангай, Өвөрхангай, Баянхонгор аймгуудад болсон уралдаанаас хоёр, гурван ч удаа түрүү хүртэж байлаа. Архангай аймгийн 80 жилийн ой, “Тамирын хурд”-аас гурван түрүү авч байлаа. Сая ээжийн минь нутаг Өврийн сайхан хангайгаас олон айраг, түрүү хүртэж, бидэндээ буян хишгээ хайрлалаа. Өвөөгийнхөө морьдоо уяж, уралдуулж байсан газраас айраг, түрүү олныг хүртсэндээ ихэд бэлгэшээж байна.
- Улсын баяр наадамд хэдэн насны морь мордуулсан бэ?
-Зургаа, долоон насны морь мордуулсанаас азарга маань долоогоор, үрээнүүд 10, 20-н хэдээр давхилаа. Морь будилаангүй эргээд, түмний морь, түмний хүүхэд хоёр бүтэн сайхан уралдаад ирэхэд л монгол наадмын гол утга учир оршдог шүү дээ.
- Асгат саарал азарганы таван төл улс, бүсийн наадамд айрагдлаа. Ах дүү Тод манлай уяачдын унаган хүлгүүд улс, бүсийн наадмыг өнгөлж, одтой сайхан наадаж байгаа нь бахархан омогшихгүй байхын аргагүй үйл явдал юм даа?
-Олон сайхан азарга, гүү цуглуулсаны л үр өгөөж юм даа. Сүүлийн жилүүдэд “Макс” угшлын адууны төлүүд сайхан гарч ирж байна. Энэ ч бас их олон жилийн хөдөлмөр шүү дээ.
- Таны нэр дээр өөр нэг шүдлэн айрагдах шиг боллоо?
-Үгүй ээ. Манай дүүгийн нэр дээр уралдаж, айрагдсан юм.
- Энэ жил их насны морьд уяагүй юм уу?
-Тийм. Энэ жил Сүүн шарга, хээр морь хоёроо өнжөөчихлөө. Манай уяанаас Винтовын их насны хонгор морь айрагдлаа.
- Mongolian Saturday сүүлийн үед хэр хурдалж байна. Нэг л чимээгүй байгаад байх чинь?
-Саяхан нэг аман хүзүүдсэн. Сайхан л давхиж байна. Ойрмогхон нэг уралдуулна аа. Монгол Жи, Mongolian shoppor  хоёр бас хоёр, гурван ч удаа түрүүлчихээд байгаа шүү.
- Ах дүү Тод манлай уяачдын хувьд авсан бай шагналаа түмэндээ түгээдэг жишиг тогтоогоод байгаа. Энэ жил л гэхэд Өвөрхангайгаас хүртсэн бай шагналаасаа 10 сая төгрөгийг буян ажилд зориуллаа гэж дуулдсан?
-Тийм ээ. Бид ерөнхийдөө бай шагналаа тухайн орон нутагт нь үлдээх, тэндхийн түмэнд хүртээх жишиг тогтоохыг зорьж байгаа юм. Өвөрхангайгаас авсан бай шагналаасаа бүтэн болон хагас өнчин, хөгжлийн бэрхшээлтэй 20 хүүхдийн ирээдүйд зориулан хадгаламж нээлгэхэд зориулсан. Нийт 10 сая төгрөгийг энэ ажилд зарцуулсан. Үлдсэн мөнгийг нь ч бас бид шаардлагатай ажлуудад нь зарцуулаад л явна даа.
- Олон уяач та бүхнээс үлгэр дуурайлал аваасай гэж хүсч байна?
-Баярлалаа. Хурдан морьдын минь хийморь олон түмэнд минь шингэх болтугай.

А.Тэлмэн