ТЭЖЭЭЛИЙН ТООСОНЦОР

А.Тэлмэн
2017 оны 12-р сарын 01 -нд

Уяач та бүхний гарцаагүй мэдэж байх ёстой нэгэн эмгэгийн талаар тодорхой ойлголт өгье. Тэжээлийн тоосонцрын эмгэг бол харьцангуй шинэ, зарим уяачид маань бараг мэдэхгүй орчин цагийн адууны эмгэг юм. Сүүлийн 20-иод жилийн  хугацаанд уяачид маань  уралдсан хүлгүүдээ тэжээлд оруулж, тэжээлээр тамир суулгаж уралдах болсон. Үүнтэй холбоотойгоор тэжээлийн тоосонцрын эмгэг үүсч байгаа билээ. Тэжээлд орсон морьдын ихэнх нь тэжээлийн  тоосонцрын эмгэгтэй болоод байгаа нь үзлэг хийх явцад ажиглагдаад байна. 
ТЭЖЭЭЛИЙН ТООСОНЦОР ҮҮСЭХ ШАЛТГААН:
Шалтгаан бол тодорхой зүйл юм. Бид адуугаа тэжээхдээ 100-ны 90 гаруй хувьд нь уутанд тэжээлээ хийж өгдөг бөгөөд адуу тэжээлээ идэх явцад уутан дахь тэжээлд агуулагдаж байгаа тоос шорооны зүйлс амьсгалын замаар дамжин уушгины мөгөөрсөн гуурсны ховилуудад очиж наалдаж тогтдог.
Мөн зөвхөн уушги гэхгүй цагаан мөгөөрсөн хоолой болон төвөнхид жижиг ширхэгтэй тоосонцрын хуримтлал үүсгэдэг юм.
ШИНЖ ТЭМДЭГ:
Давхил хийх явцад амьсгаадах буюу амьсгаа гаргах нь буруу
Давхил хийх, уралдах, сунгах зэрэг ажил хийсний дараа хий ханиах
Хий ханиалгаж байгаа боловч хамраас ямар нэг нус ялгарахгүй
Амьсгалах явц саатсанаас болж хэл хатах
Хоолны дуршил, өнгө зүс хэвийн, гадна байдлаас эрүүл харагддаг
ОНОШЛОХ
Технологи өндөр хөгжсөн оронд нарийн дурангаар дурандаж оношилдог.
Бидний хувьд бол адууны уушгийг малын эмчээр чагнуулж уушгины шуугиан, хэржигнүүрээр нь оношилно. Мөн дээр дурдсан шинж тэмдгээс үндэслэн оношилно.
Гэхдээ ханиад болон уушгины идээт үрэвслээс ялгаж оношлох хэрэгтэй.
ЭМЧИЛГЭЭ:
Амьсгалын замыг эмчлэх болон цэвэрлэх үйлчилгээтэй бэлдмэлүүдийг хэрэглэх /edurent syrop гэх мэт/
Мөн харшлын эмчилгээ давхар хийх хэрэгтэй. Учир нь тэжээлийн тоосонцор нь удсан тохиолдолд адуу тоосонцрын харшилтай болох магадлал элбэг байдаг.
Мөн үрэвслийн эсрэг үйлчилгээтэй эмийн бэлдмэлүүдийг хавсарч хэрэглэнэ.
"Жонон" мал эмнэлгийн эмч М.Мөнхбаатар

2 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.