Уяач Б.Саянсанаа: Багаасаа морь унаж, морины хүүхдүүдтэй тоглож өссөн

АХ-ын 97 жилийн ойн үндэсний их баяр наадамд эр хүний бахархал болсон их морь аман хүзүүнд хурдлуулсан Батсайханы Саянсанаагаас цөөн асуултанд хариулт авлаа. Удам залган хурд ирлэж буй залуу уяачид төрийн наадмын анхны айраг нь тун чиг сэтгэл догдлуулам сайхан байсан гэнэ.
   
- Баярын сэтгэгдлээсээ манай уншигчтай хуваалцаач?
- Төрийн наадамд их морь аман хүзүүнд хурдлууллаа. Сэтгэл маш өндөр байна. Хүй мандалын ногоон дэвжээ тоос шороогүй, хур бороотой, түмэн олон минь дэнж хотойтол дэлгэр сайхан наадаж байна.
-Улсын чанартай наадамд хэддэх жилдээ морь мордуулж байна вэ?
-Улс, бүсийн уралдаанд олон удаа морь мордуулж, энэ жил анх удаа од гийн төрийн зарлигт наадмаас хишиг хүртлээ.
- Морио хаагуур давхина гэж бодож байв?
-Айрагдана гэдэгт тийм их итгэлтэй байгаагүй. Гэхдээ энэ олон хүний сэтгэл зүрх, хүч хөдөлмөр шингэсэн учраас горьдолгүй яахав. Гарсан цагаас өнгөнд явсаар Цагаан хөтөл даваад ирэхэд нь зүрх түргэн цохилж эхэлсэн. Зурагтаар харж байгаад аман хүзүүнд бариа даваад ороход нь баярлаад  айргийн морьдын хашаа руу давхисан даа. Миний хээр морь энэ жил хавчиг. Эхний давхилаа төрийн довонд сайхан эхлүүллээ.   
-Хүнд зарим үед совин төрдөг. Магадгүй морио айрагдана гэдэг совин байсан уу?
-Тийм совин төрөөд байсан ч хүнд хэлж чадахгүй, дотроо бодоод догдлоод байсан. Их морь морддог өглөө эрт босоод Хүйн долоон худагт ирж морио мордуулахад зүрх хүчтэй цохилж байсан. Морьд эргээд зурагтаар зарлагдаж эхлэхэд нь нэг тийм сонин гоё мэдрэмж төрсөн.   
-Наадмын өмнөх сунгаанд хэр байсан бэ?  
-Дорнодын уяан дээр гайгүй тархинд давхиж байсан. Хүйн долоо худагт сунгаагүй.
-Улсын баяр наадамд хэдэн насны морь мордуулсан бэ?
-Манайх их морь, соёолон, хязаалан гурван насны морьдтой төрийн наадамдаа ирсэн. Хязаалан 30  гаргаад давхилаа. Хоёр соёолон мордуулсан ч дундаас нь татуулчихсан. Миний нэртэй  хоёр их морь мордсон. Нэг нь төрийн наадамдаа тоосоо өргөн, тоогоо нэмээд дундуур сайхан давхилаа.
-Хэзээнээс уяж эхэлсэн бэ? Мэдээж аавын нөлөө байгаа байлгүй?
-Багаасаа морь унаад морины хүүхдүүдтэй тоглож өссөн. Монгол эр хүн морь сонирхохгүй байна гэж юу байхав. Магадгүй аавын нөлөө байгаа байх. Аавын минь өдий олон жил цуглуулсан адуу, хүч хөдөлмөр байна. Сүүлийн дөрөв, таван жил аавтайгаа хамт морьддоо түлхүү анхаарч байна.
- Ярилцсанд баярлалаа.