Уралдаанч А.Батцэнгэл: Сайн уралдаанч байхын тулд хичээж байгаа

Ах-ын 97 жилийн ойн баяр наадамд унасан хүлгээ айргийн гуравт хурдлуулсан уралдаанч А.Батцэнгэлтэй уулзан баярын сэтгэгдэл хуваалцлаа.

-Баяр хүргэе.  Томоохон наадмаас хэд дэх айргаа авч байна вэ?

-Их насанд айргийн гурваар орж, уралдаанчийнхаа хувьд улсын наадмаас анхны айргаа авлаа. Дундговь аймгийн Хулд сумын харьяат, Монгол Улсын Алдарт уяач Б.Лхагва-Очир ах уяа сойлгыг нь тааруулсан юм. Өчигдөр /долдугаар сарын 10/ бас морь унасан ч айхтар мундаг давхиагүй ээ. 

-Хэд дэх жилдээ улсын наадамд оролцож байгаа билээ.

-Би уралдаанчийн хувьд шинэ хүн. Хоёр дахь жилдээ л морь унаж, анх удаа улсынхаа баяр наадамд  оролцож байгаа нь энэ.

-Тийм үү. Тэгвэл энэ хоёр жилийн хугацаанд ямар ямар уралдаанд оролцож байв?

-Түрүү жил Дундговийн бүсээс хоёр айраг авсан. Азарга гуравлуулж, соёолон бас гуравлуулсан. Дараа нь холбооны ойгоор их морь унаж тавлуулсан. Харин энэ жил Дүнжингаравт буурал морио тавлуулж, улсад сая хонгор халзан морио айрагдуулаад, ахиад говийн бүсэд түрүүлгэлээ. Эрлийз дээд ангилалд Сүлд хулаа унаж тавлуулсан.

-Сайн уралдаанч байх нь ээ?

-Сайн байхын тулд хичээж байна. Энэ жилийн хувьд сайн унаж байна гэж олон хүнд магтуулсан /инээв/.

-Энэ жилийн уралдаан ингээд дуусаа юу?

-Ганц хоёр жижиг наадамд уралдах байх.

-Уралдаанд гарахад уяач нь юу гэж захидаг вэ?

-Морио сайхан мэдэрч унаарай. Болгоомжтой унаад ирээрэй гэж захидаг юм.

-Аль морио унах дуртай вэ?

-Сая улсад айрагдсан хонгор халзан морио унах дуртай. Нэг л гоё санагдаад байдаг юм.

-Аав нь морь уядаг уу?

-Уядаггүй ээ. Би одоо Лхагва-Очир ахындаа амьдардаг юм.

-Аль сургуулийн хэддүгээр ангид сурдаг билээ?

-Дундговь аймгийн Хулд сумын дунд сургуулийн гуравдугаар ангид сурдаг.

-Том болоод ямар мэргэжилтэй болох вэ?

-Яг л Лхагва-Очир ах шигээ мундаг уяач болоод улсынхаа баяр наадамд уясан морьдоо айрагдаж, түрүүлгэнэ. Тэгээд улсын цолтой том уяач болно.

-Ярилцсанд баярлалаа. Хүсэл мөрөөдөлдөө хүрч, төрийн хишигт уяач болоорой.

П.Ундармаа

Тод магнай сэтгүүл №99