Монгол Улсын Манлай уяач Б.Энхболд: УЯАЧИД ӨӨРСДӨӨ ЖУДАГТАЙ БАЙЖ ЭРЛИЙЗЭЭ ЭРЛИЙЗЭД НЬ Л УРАЛДУУЛАХ ЁСТОЙ

-Улсын баяр наадамдаа хэдэн насанд хичнээн морьтой ирж наадаж байна вэ?
-Энэ жил улсынхаа баяр наадамд гурван насанд  морь уялаа. Шүдлэнд хоёрыг мордуулж, хоёулаа нэлээн араас зүтгээд 13,14-өөр дараалаад орчихлоо. Их морь 50 гаргаад ирлээ. Өнөөдөр эрлийз дээд насанд хонгор үрээгээ мордуулаад айргийн гурваар давхиулаад байна. 
-Отгонтэнгэр хайрханы хүүхдүүд энэ баяр наадамд одтой наадах шиг боллоо? 
-Энэ жил Завханчууд улсын баяр наадмаасаа нэг түрүү, гурван айраг авч их сайхан наадлаа. Үүнд миний бие айргаар амжилт нэмсэндээ баяртай байна.  
-Энэ нь хонгор морь гурав дахь айраг гэв үү?  
-Тийм ээ. Миний хонгор морь улсын наадамд гурав дахь айргаа хүртлээ. Мөн бүсийн уралдаанаас нэг түрүү, нэг айрагтай хурдан ажнай байгаа юм. 
-Тэгвэл айрагдана гэдэгт нь итгэл төгс байжээ дээ?
-Тэгэлгүй яах вэ. Энэ жил хонгор үрээгээ айраг авчирна гэдэг итгэл төгс байсан гэж болно. 
-Ямар үүлдрийн цус орсон адуу вэ?
-Хонгор морины эцэг нь Васград гэж миний өөрийн араб азарга байгаа. Эх нь Хэнтийн Мөрөнгийн Босоо Жамсран гэж хүний алдартай хонгор гүү. 
-Ах дүүс нь хэр хурдалж байна вэ?
-Охин дүүгээс нь гарч байгаа унаганууд их хурдан байгаа. 
-Баяр наадмын хурдан морины уралдааны талаарх таны сэтгэгдэл ямар байна вэ. Эерэг үү, сөрөг үү? 
-Зохион байгуулалт бол ярих юмгүй сайхан болж байна. Харамсалтай нь эрлийз монголоор нь ялгах асуудал чамлалттай байлаа. Олон уяачдын сайхан монгол адуунууд хасагдаж гомдолтой үлдсэн асуудал байх шиг байна. Гэсэн хэдий ч баяр наадам журмаа гаргасан учраас дүрэм журамдаа захирагдаж, маргаангүй наадлаа. Уяачид маань ч өөрсдөө жудагтай байж эрлийзийг нь  эрлийзэд нь л уралдуулах ёстой. Нэгэнт гаргасан олноороо баталсан дүрэм журам байгаа бол тэрийгээ л дагах нь зүйтэй шүү дээ. 
-Таны хувьд жудагтай уяач байж өөрийн биеэр үлгэрлэж чадаж байгаа юу?
-Тийм гэж хариуцлагатай хэлнэ. Надад эрлийз адуунууд бий. Хамгийн том нь хонгор морь, түүнээс доошоо бага үрээнүүд байгаа. Эрлийзүүдээ бол бүгдийг нь л эрлийздээ мордуулдаг. Зургаан насандаа бол монгол адуугаа л мордуулна.  
-Наадмын дараа аль бүсийн уралдаанд очих вэ?
-Эрдэнэт, Булган, Сүхбаатар, Дорноговьд бүсийн уралдаанууд болохоор Засгийн газрын тогтоол гарсан байна билээ. Морьдынхоо байр байдлыг харж байгаад л эдний аль нэг рүү нь явна даа.
-Бүсийн уралдаанд амжилт гаргахыг хүсье.

"Тод магнай"сэтгүүл. Дугаар 100. 2018 он