Аймгийн Алдарт уяач Б.Ганболд: Үрээгээ түрүүлгэнэ гэсэн бодолтой ирсэн

Сэтгүүлч
11-р сарын 21 -нд

-Төрийн  наадмын хишиг хүртсэн танд нийт уншигчдынхаа өмнөөс баяр хүргэе.

-Баярлалаа. Анх удаа улсынхаа наадмыг зорин ирж уралдаад айраг хүртсэндээ баяртай байна. Хээр үрээнийхээ уяа сойлгыг нутагтаа буюу Хөвсгөл аймгийн Их-Уул суманд тааруулж байгаад наадмын өмнөхөн наашаа гарсан.

-Танай сум  шинэ цагийн адуу олонтой юу?

-Ховор доо. Ганц хоёр  л адуу бий. Та бүхэн таних байх. 2016 оны улсын наадамд хул азаргаа айргийн тавд хурдлуулсан Дэнзэнгийн Энхтөр ахын нэг цэвэр азарга бий. Би үрээнийхээ ажлыг галынхаа азаргануудтай цуг хийчихдэг байсан юм.

-Хаврын бүсийн уралдаанд айрагдсан нь төрийн наадмыг зориход түлхэц болсон байх.

-Тэгэлгүй яахав. Түүнээс биш улсын наадмын дов том  бөгөөд хатуу шүү дээ. Сайн адуутай болохоор зориг гаргаж тэр холоос ирсний хэрэг гарч, яахав ээ үрээ маань айрагдлаа.

-Яахав ээ гэхээр арай өөр бодолтой иржээ дээ.

-Ний нуугүй хэлэхэд үрээгээ түрүүлгэнэ гэсэн бодолтой ирсэн. 

-Улсын наадмын дараа хаана уралдсан бэ?

-Морины олимп гэгддэг “Их хурд-8” уралдааны холимог төрөлд мордуулж 13-аар давхиулсан. Түүнээс хойш уралдаагүй ээ.

-Ганболд Алдарт төрийн зарлигт наадмаас хэд дэх хишгээ хүртээд байгаа нь энэ вэ?

-Хавар “Дүнжингаравын хурд”-д хээр үрээгээ айрагдуулж, том наадмын анхны хишгээ хүртсэн. Улсын наадмын аман хүзүү хоёр дахь нь. Түүнээс өмнө бол орон нутгаараа нааддаг байлаа.

-Орон нутгийн чанартай уралдааны олон айраг, түрүүтэй юу?

- Хар морь, хүрэн азарга хоёроо хурдлуулан, 2015 онд аймгийн Алдарт уяач цол хүртсэн. Хүрэн азарга нь Сүхбаатар  аймгийн Халзан сумын Эрдэнэдалайн Эрдэнэбилэгийн адуу. Хар морь нь Сүхбаатар аймгийн Эрдэнэцагаан сумын харьяат Эзэнмөнхийн Мөнх-Эрдэнийн адуу. Магнай халиун азарганы уяач шүү дээ. Би 2010 онд авч байсан юм. Авсан жилээ аймагт түрүүлээд, аймгийн бүсийн уралдаануудад хэд хэд айрагдсан.

-Сүхбаатарын адуугаар нааддаг юм байна.

-Тийм ээ. Ах нь эцэг эхээс долуулаа. Таван бандийн дөрөв нь морь уядаг, аймгийн Алдарт уяач цолтой. 1996 оноос ах нараа даган морь уяж эхэлсэн дээ.

-Нэг айлын хөвгүүд цөм орон нутгийн дээд цолонд хүрсэн гэхээр бахтай сайхан байна шүү. Улс, бүсийн уралдаанд оролцдог уу?

-Оролцохоор барах уу. Цөм бүсийн уралдаанаас айраг хүртсэн. Даваадорж ах маань Тоглохын талд болсон Тамирын хурд уралдаанд Туулай хээр морио гурваар давхиулсан бол Даваацэрэн ахын Бөөдий бор Баян-Өлгийд болсон баруун бүсийн уралдаанд айргийн дөрөвт давхисан. Мөн миний дээд талын ах, аймгийн Алдарт уяач Ганзоригийн халзан үрээ баруун бүсийн уралдаанд таваар уралдсан. Туулай хээрийн эзэн Даваадорж ах маань “Очирваанийн хурд- 2009” баруун бүсийн уралдаанд Дэнзэнгийн Энхтөрийн Итгэлт хүрэн азаргыг уяж айрагдуулсан. Мөн манай баз дүү, аймгийн Алдарт уяач Пүрэвдорж 2016 онд Д.Энхтөрийн хул азаргыг уяж улсад айрагдуулсан.

-Алдартуудын залгамж халаа болсон залуучууд бэлтгэгдэж байна уу?

-Даваацэрэн, Даваадорж нарын хүүхдүүд аймгийн Алдарт уяач болчихсон. Ганзориг ахын хүү сумын Алдарт уяач цолтой. Манай банди бас сумын цолтой. Бүгд л удам залган морь уяж байна.

-Морь уях төрийн хэрэгт амжилт гаргаж буй бүлийнхний тухай дуулах таатай байна. Ингэхэд хээр үрээний эзэн Мөнхбаяр таны найз уу?

-Тийм ээ. “Ховолжийн ундрах” ХК-ийн захирал Бямбаагийн Мөнхбаяр гэж залуу бий. Ноднингоос морьдыг нь уяж байгаа юм.

-Та бүхний цаашдын үйлсэд амжилт хүсээд, ярицлагаа таны хамгийн сайхан наадмын дурсамжаар өндөрлөе.

-Хоёр, гурав байна л даа. Алийг нь хэлдэг юм билээ./инээв/ 2010 онд хүрэн азарга маань даагандаа мотоциклийн байтай том баярт түрүүлэхэд их баярласан. Түүний дараа энэ хавар хээр үрээгээ бүсийн уралдаанд айрагдахад бас их баярласан.

-Ийм баяр бахдалт наадам олон байх болтугай.

Б.Хастөр

3 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.