Уралдаанч С.Эрхэмбаяр: Улсад уралдаж байгаа морьдын хөл хурдтай юм аа

Сэтгүүлч
2020 оны 11-р сарын 10 -нд

Тулгар төрийн 2229, Их Монгол Улс байгуулагдсаны 814, Ардын хувьсгалын 99 жилийн ой, Үндэсний их баяр наадамд Баянхонгор аймгийн Баацагаан сумын уугуул С.Энхтөрийн хээр соёолон айргийн дөрвөөр давхиж наадамчин олноо баясгасан юм. Уг соёолонг 317 дугаартай, 11 настай уралдаанч С.Эрхэмбаяр унаж, ийнхүү хурдлуулсан билээ. Түүнийг хөлсний цэнхэр хашаанд орж ирээд байхад нь бид цөөн хором ярилцсан юм. 


Зургаа дахь жилдээ морь унаж буй Эрхэмээ хүүгийн хувьд улсын наадмын анхны айраг гэнэ. Өнгөрсөн жил улсын бүсэд найм, араваар уралдаж, өчигдөр (2020.07.11) азарга 10-аар, их морь 19-өөр давхиулсан аж. Баянхонгор аймгаас ирсэн тэрээр “Улсын наадам бусад уралдаанаас ялгаатай байна шүү. Уралдаж байгаа морьдынх нь хөл аргагүй л хурдтай юм аа. Би соёолон унах дуртай. Айрагт багтсан соёолонгууд бүгд л мундаг байлаа. Морь унах гоё. Гэхдээ айраг, түрүүгээр давхиулах бүүр гоё юм байна. Наадмын дараа гэртээ хариад ярих сонин ихтэй. Цалингаа аваад ээж, аавыгаа баярлуулна даа. Манай ах морь унадаг байсан юм. Одоо ч хасагдсан л даа. 18 настай болсон. Ах наадмаас их сонинтой ирдэг байлаа” гэсээр ам халчихсан ярьж зогстол комиссын гэрээс дуудсанаар бидний яриа аргагүйн эрхэнд өндөрлөсөн юм. 

П.Ундраа

1 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.