Шилмэл гүүний дуудлага худалдаа боллоо

Амжилт гаргаж алдар цолонд хүрсэн уяачид уяхуйд анхаарахаас илүүтэй адуугаа сайжруулах зорилго тавь хэмээн зөвлөдөг. Харин үржил хийж буй уяачид хамгийн чухал нь ГҮҮ хэмээн нэгэн зэрэг хариулдаг билээ. Үнэхээр ч удам сайт гүү бол уяачийн үнэт эрдэнэ юм. Үүнийг мэдэрч, цаг үетэй нь уялдуулж чадсан Хан Хэнтийхэнд баяр хүргэе.

Өчигдөр буюу билгийн тооллын хаврын адаг сарын шинийн 8 нд Хэнтий аймгийн шилмэл гүүнүүдийн дуудлага худалдаа Тэрэлж дэх Хаадын хаан морин паркт боллоо.

Арав гаруй сумаас ирсэн 20 гүү таван сая төгрөгнөөс эхлэн дуудагдаж хагас цагийн дотор цөм эзнээ олсон нь цаг үеэ мэдэрсэн үйл ажиллагаа байсныг илтгэх.

Дээрх дуудлага худалдаанд ХХААЯ-ны сайд, МУ-ын Манлай уяач З.Мэндсайхан, МУ-ын Заан Ч.Батзориг, ММСУХ-ны тэргүүн Тод манлай уяач Ц.Батсайхан, Тод манлай уяач Д.Хишигжаргал, МУ-ын Манлай уяач М.Мөнхбат, ММСУХ-ны Ерөнхий нарийн бичгийн дарга МУ-ын Алдарт уяач Ч.Хишигбаатар, ажлын албаны дарга Батбаатар тэргүүтэй морины зүтгэлтнүүд хүрэлцэн иржээ.

2019 онд одтой сайхан наадан төрийн наадмаас хоёр ч айраг хүртсэн Ч.Батзориг Заан дөрвөн гүү авсан нь хамгийн олонд тооцогдоно. Тэрээр Дэлгэрхаан сумаас ирсэн хээр гүүг хамгийн өндөр ханшаар өөрийн болгож, МУ-ын Алдарт уяач Д.Энхсүхийн Аварга хээрийн төл хээр, аймгийн Алдарт уяач А.Ууганбаярын халиун, Цэнхэрмандал сумын Сандагдоржийн Оонон харын төлийн төл  хул гүүг тус тус авсан юм.

“Морьтон” үржүүлгийн төвийнхөн энэ дуудлага худалдаанд идэвхитэй оролцогсдын нэг байв. Тэд Хэрлэн сумаас ирсэн сумын Алдарт уяач Н.Алтантөгсийн  хүрэн зээрд, Батширээт сумаас ирсэн Э.Энхболдын хүрэн, Галшар сумаас ирсэн дуучин Чинболорын  хул гүүг тус тус авлаа.

Олон гүү авсан дараагийн эрхэм бол хоймор нутгийн хийморилог хүү Гантулга байсан юм. Тэрээр дуудлага худалдааны салхийг хагалж, Тод манлай уяач Г.Алтангэрэлийн бага хүрэн азарганы төл Б.Батцагааны хүрэн гүүг өөрийн болгосон бол дараа нь “Сэцэн ханы хүлэг” МСУХ-ны хүндэт тэргүүн Т.Батжаргалын хүрэн,  Биндэр сумын харьяат, аймгийн Алдарт уяач Ц.Базарсадын  хонгор гүүг тус тус худалдан авсан юм. Ийнхүү гурван эрхэм нийт гүүнүүдийн талыг нь хуваан авч, үлдсэн 10 гүүг бусад зочид үнэ хаялцан авсан билээ.

Дуудлага худалдааны төгсгөлд ММСУХ-ны тэргүүн Ц.Батсайхан ”Ийм сайхан арга хэмжээг санаачлан зохион байгуулсан Хэнтий аймгийн “Сэцэн ханы хүлэг” МСУХ-ны хамт олондоо баяр хүргэе.  Бусад салбар холбоод үлгэр авч хэрэгжүүлмээр сайхан ажил санаачилжээ” хэмээсэнтэй санал нэг байна.

Б.Хастөр