Аймгийн Алдарт уяач Н.Нацагдорж: Өндөр төрийн өргөн босгыг давж айраг хүртсэндээ маш их баяртай байна

Сэтгүүлч
2022 оны 7-р сарын 12 -нд

АХ-ын 100, 101 жилийн ойд соёолон айргийн гуравт хурдлуулсан Хөвсгөл аймгийн Галт сумын харьяат, аймгийн Алдарт уяач Намжилдоржийн Нацагдоржийн баярын сэтгэгдлийг хуваалцаж байна. 

-Түмнийхээ их цэнгэлд түрлэг нэмсэн эрхэм танд баяр хүргэе.

-Баярлалаа сайхан наадаж байна. Ардын Хувьсгалын 100, 101 жилийн ойн баяр наадамд өөрийн унаган соёолонгоо өөрөө уяж сойгоод айрагдууллаа. Өндөр төрийн өргөн босгыг давж айраг хүртсэндээ маш их баяртай байна.

-Унаган адуу айрагдуулах урамтай сайхан байлгүй яах вэ. Удам, угшлыг нь дэлгэрүүлээч.

-Эцэг нь миний өөрийн хээр азарга. Харин эх нь Сүхбаатар аймгийн Дарьганга сумын харьяат Бямбаа гэж залуугийн халтар гүү байдаг юм. Дааган цагаасаа эхлэн аймаг, орон нутгийн чанартай уралдаан наадамд олон түрүүлж, айрагдсан. Одоо тулгамдаад хэлж чадахгүй байна. Ер нь түрүү, аман хүзүүнд л уралддаг буян байгаа юм.

-Энэ баярт мөчийг зөгнөн бэлгэшээж байв уу?

-Хурдан байсан болохоор айрагдах байх гэж бодсон.

-Таныг  хурдан  морь сонирхогчид Хөвсгөлийн ягаан халзан морины эзэн гэдгээр эчнээ мэднэ. Засгийн газрын тогтоолт бүсийн уралдаанаас айраг түрүү хүртэх, төрийн наадамд морь айрагдуулах хоёр ялгаатай юу?

-Ялгаатай, ялгаатай. Баярлаад хэлэх үгээ олж чадахгүй байна. /инээв/ Үнэхээр их баярладаг юм байна. Хоолой зангираад ярихад ч амаргүй байна шүү. /инээв/

-Энэ мэдрэмжийг хүртэхийн тулд хичнээн жилийн хөдөлмөрөө зориулсан бэ? Өөрөөр хэлбэл хэдэн жил хурдан морь уяж байна вэ?

-Морь уяад арав гаруй жил болж байна. Бүсийн уралдаанаас 6-7 айраг хүртсэн.

-Улсынхаа их баяр наадамд хэдэн насны хэдэн морьтой ирсэн бэ?

- Гурван насны морьтой ирлээ. Уржигдар хязаалан үрээ мордуулж, 15-аар давхиулсан. Маргааш сонгомол дээд насанд азарга мордуулна.

-Шинэ дүрмээр зохион байгуулагдаж буй баяр наадмын талаар ямар бодолтой байна вэ? Орон нутгаас зорьж ирсэн  та бүхний хүлээлтэнд хүрэв үү?

-Хэмжилтээ зөв шударга уралдахад болно л доо.

-За баярлалаа, дараагийн уралдаанд нь амжилт хүсье.

-Баярлалаа.

А.Тэлмэн

1 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
  • 102.89.33.218
    2022 оны 7-р сарын 15 -нд

    Та бөөрийг худалдахыг хүсч байна уу? Та санхүүгийн хямралын улмаас бөөрийг зарж борлуулах боломжийг эрэлхийлж байна уу, юу хийхээ мэдэхгүй байна уу? Дараа нь бидэнтэй холбоо бариад DR.PRADHAN.UROLOGIST .LT.COL@GMAIL.COM хаягаар бид танд бөөрнийх нь хэмжээгээр санал болгох болно. Яагаад гэвэл Yнэ: $780, 000 (Долоон зуун, Наян мянган доллар)

    Reply