Их ойгоор зодог тайлсан хүлгүүд

АХ-ын 100, 101 жилийн ойн баяр наадам хүлээлт өндөртэй байлаа.Тэгш ойн наадам, төр түмнийхээ их цэнгэлд хурд хүч шалгахаар нас болгонд 400 гаруй хүлэг бүртгүүлснийг харахад л /азарганаас бусад нь / дээрх таамаг батлагдана.

1.Түүхт ойн баяр наадмаар түмэн олноо шуугиулж, баярын магнай тэнийлгэж байсан хурдан хурц хүлгүүдээс дөрөв нь зодог тайлжээ. Үүний нэг нь энэ цагийн  домогт хурдан хүлэг Амгалан төрийн ажнай шарга азаргыг дийлж,  шигшмэл хурдан морьдын “Их хурд-4” уралдаанд түрүү магнайд хурдалсан Завхан аймгийн Яруу сумын уугуул, аймгийн Алдарт уяач Цагаанбандийн Баянжаргалын Магнай халтар азарга юм.

Төв аймгийн Баянцогт сумын харьяат Чулуунбаатарын Отгонбаярын унаган хүлэг Магнай халтар азарга 2006 онд Багануур-Бага Хэнтийн бүсийн уралдаанд гурвалж, Эрдэнэт хотын 30 жилийн ойд зургаалж, Архангай аймгийн Тоглохын талд болсон хангайн бүсийн уралдаанд айргийн тавд хурдлан морины хорхойтнуудын хараанд өртжээ.

Дараа жил нь буюу 2007 онд улсын баяр наадамд аман хүзүүнд хурдалж, давхар уяагаар Их хурд-IV уралдаанд түрүүлэн ирж, түмэн эхээр цоллуулсан юм. 2008 онд улсын баяр наадам болоод Алтан овооны тахилга зүүн бүсийн уралдаанд долоод хурдалж байжээ. Төрийн зарлигт наадмын нэг түрүү, хоёр айргийн эзэн Магнай халтар азарга энэ жил 22 настай.

2.АХ-ын 100 жилийн ойгоор зодог тайлсан дараагийн хүлэг бол Говь-Алтай аймгийн Бигэр сумын уугуул, Орхон аймгийн Баян-Өндөр сумын харьяат, Монгол Улсын Алдарт уяач агсан Бөөрөнхийн Амарбаясгалангийн хүрэн халзан морь юм.

14 настайдаа улсын баяр наадам /АХ-ын 92 жилийн ойд айргийн тавд хурдалсан/ болоод шигшмэл хурдан морьдын “Их хурд-6” уралдаанд айрагсдан энэхүү  цуут хүлэг өнөө жил 23 настай аж.

3. 100 жилийг хүлээж зодог тайлсан дараагийн хурдан хүлэг АХ-ын 95 жилийн ой, Үндэсний их баяр цэнгэл наадмын түрүү, шигшмэл морьдын “Их хурд-7” уралдааны аман хүзүү, Өвөрхангай аймгийн Тарагт сумын харьяат, аймгийн Алдарт уяач Бадрахын Энхбаатарын хонгор халзан морь юм. 10 настай төр түмний цэнгэлд түрүүлж байсан халзан морь өнөө жил 16 настай юм.

4.Зодог тайлсан дараагийн хүлэг бол төрийн зарлигт наадмын нэг түрүү, хоёр айргийн эзэн Төв аймгийн Баян сумын уугуул, Монгол Улсын Манлай уяач Пунцагбалжирын Энхмөнхийн Хайр хул юм. Даагандаа улсын наадамд гурвалж, соёолондоо “Их хурд-8” уралдаанд айрагдан, уржнан сонгомол дээд ангилалд түрүүлсэн хул азарга уг нь идэрхэн хүлэг ч эзэн уяач нь уралдааныг нь отголохоор шийджээ.

Б.Хастөр