ТОД МАГНАЙ ПОДКАСТ №108: МУ-ЫН АЛДАРТ УЯАЧ М.ЦЭРЭНЖАВ

"Тод магнай" подкастын 108 дахь дугаарын зочин бол МУ-ын хоёр удаагийн шилдэг залуу уяач, мөн хоёр удаа чансаа өндөр уяачид эрэмбэлэгдсэн Төв аймгийн Баярцогт сумын уугуул, улсын Алдарт уяач Мөнхбатын Цэрэнжав байх болно.

Бие дааж морь уясан анхны жилээ буюу 2014 оны Монгол төрийн наадамд их насны морь түрүүлгэж, давхар уяагаар говийн бүсэд айрагдуулсан тэрээр өнгөрсөн найман жилийн хугацаанд улс, бүсийн уралдаанаас гурван түрүү, 16 айраг хүртжээ.
Өнөө жилийн хувьд Сүхбаатар аймагт болсон зүүн бүсийн уралдаанаас нэг түрүү хоёр айраг, Ховд аймагт болсон баруун бүсийн уралдаанаас нэг айраг хүртсэн юм.
Дашрамд сонирхуулахад зүүн бүсэд түрүүлсэн Л.Анхбаатарын хүрэн халзан, баруун бүсэд айрагдсан Ганбатын халтар шүдлэнгүүдээс бусад нь өөрийнх нь унаган хүлгүүд.
Харин дээрх хоёр үрээ Төв аймгийн Заамар сумын харьяат аймгийн Алдарт уяач Энхболд агсны унаган адуунууд гэнэ. "Энхболд ахын адуу" гэдгийг тодотгоод өгөөрэй эгч хэмээн хүссэнийг уламжилж байна.
Амжилттай яваа залуу Алдартын ярилцлага ирэх даваа гарагийн 11 цагт Тод магнай пэйж хуудас болон юүтүбийн Тод магнай, Долгион сувгаар дамжин хүрэх болно.